استانادا «ÓzgeEpic»العاشقى ءىرى شىعارماشىلىق حابى اشىلدى
استانا. KAZINFORM - استانا قالاسىنىڭ اكىمى جەڭىس قاسىمبەك Instagram-داعى پاراقشاسىندا جاڭادان اشىلعان شىعارماشىلىق حاب تۋرالى ايتتى. بۇل تۋرالى ەلوردا اكىمدىگىنىڭ رەسمي سايتى جازدى.
«ەلوردادا العاشقى ءىرى شىعارماشىلىق حاب («ميرنىي دوم» تۇرعىن ءۇي كەشەنىندە ورنالاسقان) اشىلدى. «ÓzgeEpic»حابىنا بىرەگەي ەتنو-مۋزەي مەن قولونەر شەبەرحاناسى كىرەدى. مۇندا قوناقتارعا زاماناۋي ارت-پەرفورمانس، مۋزىكالىق جانە ادەبي كەشتەر ءۇشىن ترانسفورمەر زال، زاماناۋي ونەر گالەرەياسى، تەاتر الاڭى جانە ۇلتتىق ويىنداردىڭ سمارت ايماعى ۇسىنىلادى. حاب اۋماعىندا قازاقستاندىق باسپالاردىڭ ونىمدەرىن ساتۋعا ارنالعان كىتاپ دۇكەنى بار»، - دەپ جازدى قالا باسشىسى.
جەڭىس قاسىمبەك سونداي-اق استاناداعى حابتىڭ شىعارماشىلىق نارىققا كوپتەگەن ماماندى قوسۋعا سەبەپشى بولاتىنىن جەتكىزدى.
«مەملەكەت باسشىسى كرەاتيۆتى ەكونوميكا - تالانتتى، شىعارماشىل ادامداردى قىزىقتىراتىن ءىرى قالالاردىڭ دامۋىنىڭ قوزعاۋشى كۇشى ەكەنىن اتاپ ءوتتى. استاناداعى كرەاتيۆتى حابتىڭ ماقساتى - باسەكەگە قابىلەتتى زاماناۋي ونەردى دامىتۋ جانە قوعامنىڭ مادەني ساناسىن ارتتىرۋ، دارىندى جانە ينتەللەكتۋالدى جاستاردى قولداۋ ءارى تالىمگەرلىك ەتۋ. حاب شىعارماشىلىق نارىققا جۇزدەگەن ماماندى قوسۋعا ىقپال ەتەدى»، - دەدى ەلوردا اكىمى.