استانادا ينۆەستيتسيا تارتۋ جۇمىستارى جۇيەلى جۇرگىزىلىپ جاتىر

استانا. KAZINFORM - مەملەكەت باسشىسى قاسىم-جومارت توقايەۆ بيىلعى جولداۋىندا ينۆەستيتسيا تارتۋ ماسەلەسىنە ەرەكشە توقتالدى. بۇل رەتتە، استانا قالاسىندا كاپيتال اعىنى ءۇشىن قولايلى ينۆەستيتسيالىق احۋال قۇرۋ بويىنشا جوسپارلى جۇمىس جۇرگىزىلىپ جاتقانىن اتاپ وتكەن ءجون.

ەلىمىز بويىنشا ستاتيستيكاعا كوز جۇگىرتسەك، ەلوردا نەگىزگى كاپيتالعا سالىنعان ينۆەستيتسيالار كولەمى بويىنشا تاۋ-كەن وندىرمەيتىن وڭىرلەر اراسىندا جىل سايىن كوشباسشى ورىندا تۇر.

اسىرەسە، شەتەلدىك ينۆەستورلارمەن ارىپتەستىكتى دامىتا ءتۇسىپ، ىنتىماقتاسۋ - باستى نازاردا. شەتەلدىك ينۆەستيتسيالاردىڭ نەگىزگى كوزدەرى نيدەرلاند، بەلگيا، ا ق ش، شۆەيتساريا، رەسەي، وڭتۇستىك كورەيا جانە وزگە دە مەملەكەتتەر ەل ەكونوميكاسىنا قارجى قۇيۋعا نيەتتى.

وسى رەتتە، ەلوردادا «ءبىر تەرەزە» قاعيداتى بويىنشا جۇمىس ىستەيتىن جانە جوبالاردى سۇيەمەلدەۋدى جۇرگىزەتىن «استانانى دامىتۋ ورتالىعى» فرونت-وفيسى جۇمىس ىستەيتىنىن اتاپ وتكەن ءجون. بۇل ماڭىزدى شارۋاعا «Astana Invest» ماماندارى دا كومەك كورسەتەدى. بۇل - ەلوردانىڭ ارنايى ەكونوميكالىق ايماقتارىنىڭ باسقارۋشى كومپانياسى.

اتالعان ورتالىقتاردىڭ ماماندارىنا حابارلاسقانىمىزدا، ولار ينۆەستورلار ءوز قىزمەتىنىڭ سيپاتى مەن سالاسىنا بايلانىستى ءارتۇرلى نىسانداردا مەملەكەتتىك قولداۋ الا الاتىنىن اتاپ ءوتتى. سونداي نىسانداردىڭ ءبىرى - ينۆەستيتسيالىق كەلىسىمشارت نەمەسە ينۆەستيتسيالىق كەلىسىم نەگىزىندە بەرىلەتىن ينۆەستيتسيالىق پرەفەرەنتسيالار.

«ينۆەستيتسيالىق كەلىسىمشارت مەحانيزمى جەر ۋچاسكەلەرىن بەرۋ، كەدەندىك باجدار مەن سالىقتاردان بوساتۋ جانە شەتەلدىك جۇمىس كۇشىن تارتۋ مۇمكىندىگى سياقتى ءبىرقاتار جەڭىلدىكتەردى قاراستىرادى. سونداي-اق الدىڭعى جىلدارى 25 جىلعا دەيىنگى مەرزىمگە جاسالاتىن جانە قازاقستان رەسپۋبليكاسىنىڭ زاڭناماسىندا كوزدەلگەن بارلىق جەڭىلدىكتەردى بىلدىرەتىن ينۆەستيتسيالار تۋرالى كەلىسىم ىسكە قوسىلعان بولاتىن. بۇل جەڭىلدىكتەردى الۋدىڭ باستى شارتى - جوبانىڭ ۇكىمەت بەكىتكەن باسىم قىزمەت تۇرلەرىنىڭ تىزبەسىنە سايكەستىگى»، - دەيدى «استانانى دامىتۋ ورتالىعى» فرونت-وفيسى باسشىلىعى.

قولداۋدىڭ تاعى ءبىر ءتۇرى - «ارنايى ەكونوميكالىق جانە يندۋستريالىق ايماقتار تۋرالى» زاڭناماعا سايكەس بەرىلەتىن جەڭىلدىكتەر. ولار «استانا - جاڭا قالا» جانە «استانا-تەحنوپوليس» ارنايى ەكونوميكالىق ايماقتارىنىڭ قاتىسۋشىلارىنا ۇسىنىلادى. بۇل ارتىقشىلىقتار ينۆەستورلارعا جەر ۋچاسكەلەرىن، كەيبىر سالىقتار مەن كەدەندىك باجداردان بوساتۋدى جانە شەتەلدىك جۇمىس كۇشىن جۇمىسقا تارتۋدىڭ جەڭىلدەتىلگەن ءتارتىبىن ۇسىنادى.

«استانا دامۋ ورتالىعى» جانە «Astana Invest» فرونت-وفيستەرى جوعارىدا كورسەتىلگەن قولداۋ شارالارىن وتەۋسىز جانە جان-جاقتى كومەك كورسەتەدى. ەلوردا ەكونوميكاسىنا ىقتيمال قايتا ينۆەستيتسيالاۋ ءۇشىن جەر ۋچاسكەسىن رەسىمدەۋدەن باستاپ، وبەكتىلەردى پايدالانۋعا بەرگەننەن كەيىن جوبالارعا بايلانىستى بارلىق ماسەلەنى شەشۋگە كومەكتەسەدى.

ءاربىر جوباعا ناقتى مەنەدجەر بەكىتىلىپ، قادامدىق جول كارتاسى جاسالىپ، ناقتى ۋاقىت رەجيمىندە جوبالار بويىنشا مونيتورينگ جۇرگىزۋگە جانە ىسكە اسىرۋ بارىسىن باقىلاۋعا مۇمكىندىك بەرەتىن «ينۆەستيتسيالىق جوبالار كارتاسى» ەلەكتروندىق جۇيەسى ىسكە قوسىلدى.

سونىمەن قاتار، اپتا سايىن بارلىق مەملەكەتتىك مەكەمەلەردىڭ، كوممۋنالدىق قىزمەتتەردىڭ جانە باسقا دا مۇددەلى تۇلعالاردىڭ قاتىسۋىمەن جۇمىس كەڭەستەرى وتكىزىلەدى، وندا ينۆەستوردىڭ ءاربىر ماسەلەسى جەكە قارالادى، پارمەندى شەشىمدەر قابىلدانادى، وسىلايشا، ينۆەستوردىڭ بىردە- ءبىر باستاماسى نەمەسە پروبلەماسى اكىمدىكتىڭ نازارىنان تىس قالمايدى.

سونداي- اق، يندۋستريالىق پاركتەر جۇمىسىنىڭ وڭ اسەرىن اتاپ وتكەن ءجون. بۇگىنگى تاڭدا № 1 يندۋستريالدى پاركتىڭ ەكونوميكانى دامىتۋداعى ءرولى وراسان. ءقازىر جالپى اۋدانى 409 گا بولاتىن 150 جوباعا ارنالعان وسىنداي ەكىنشى پارتكتى قۇرۋ بويىنشا جۇمىس جۇرگىزىلىپ جاتىر. باسىم باعىتتاردىڭ قاتارىندا ماشينا جاساۋ، حيميا، مەتاللۋرگيا، تاماق، جەڭىل ونەركاسىپ، قۇرىلىس يندۋسترياسى، اعاش وڭدەۋ، فارماتسيەۆتيكا، قويما شارۋاشىلىعى جانە IT تەحنولوگيالار سالاسى بار.