استانادا وتەتىن BaiQymyz فەستيۆالىندە 16 تونناعا جۋىق قىمىز ۇسىنىلادى
استانا. KAZINFORM - استاناداعى «قازانات» يپپودرومىندا 19-20-شىلدە كۇندەرى حالقىمىزدىڭ ەجەلگى ءارى كيەلى سۋسىنى - قىمىزعا ارنالعان بۇرىن-سوڭدى بولماعان كولەمدەگى «BaiQymyz - باپتالعان قىمىز جانە ۇلتتىق تاعامدار» گاستروفەستيۆالى وتەدى، دەپ جازدى ەلوردا اكىمدىگىنىڭ رەسمي سايتى.
قازاقستاننىڭ بارلىق وڭىرىنەن 50 دەن استام قىمىز ءوندىرۋشى قاتىسادى. ءىس-شارا بارىسىندا جالپى كولەمى 16 تونناعا جۋىق قىمىز ۇسىنىلادى دەپ جوسپارلانىپ وتىر.
گاستروفيستيۆالگە قاتىسۋ تەگىن. فەستيۆالگە 50-60 مىڭ ادام كەلۋى مۇمكىن.
قوناقتار ەكى كۇن بويى ءارتۇرلى وڭىرلىك قىمىزدان ءدام تاتىپ، شيپالى سۋسىننىڭ قاسيەتىمەن تانىسادى. قىمىزدىڭ ەمدىك قۋاتى مەن ءداستۇرلى دايىندالۋ ادىستەرى شەبەرلىك ساباقتارى مەن عىلىمي كونفەرەنسيالاردا كەڭىنەن تالقىلانادى.
«ەڭ ۇزدىك قىمىز» اتاعى ءۇشىن بايقاۋ فەستيۆالدىڭ باستى وقيعاسى بولماق. ساپاسى مەن ءدامى ۇيلەسكەن، ءداستۇرلى ادىسپەن دايىندالعان ەڭ شيپالى قىمىز يەلەرى قوماقتى جۇلدە قورىنا يە بولادى.
جۇلدە قورى - 45 ميلليون تەڭگە:
• I ورىن - 20 ميلليون تەڭگە؛
• II ورىن - 15 ميلليون تەڭگە؛
• III ورىن - 10 ميلليون تەڭگە.
قىمىزبەن قاتار، ءىس-شارا اياسىندا جىلقى كورمەسى، قازاقي تۇقىمداردى تانىستىرۋ، ات ابزەلدەرى جارمەڭكەسى، ۇلتتىق سپورت تۇرلەرىنەن جارىستار، قولونەر شەبەرلەرىنىڭ شەبەرلىك ساباقتارى، عىلىمي كونفەرەنسيا جانە اۋكسيوندار وتەدى. بۇل ارقىلى جىلقى مادەنيەتى مەن اۋىل شارۋاشىلىعىنا تىڭ سەرپىن بەرۋ كوزدەلىپ وتىر.
فەستيۆال قوناقتارى گەرمانيا، رەسەي، قىرعىزستان ەلدەرىنەن كەلگەن عالىمدار، دارىگەرلەر مەن ۆەتەرينارلاردىڭ باياندامالارىن تىڭداپ، قىمىز كاپسۋلالاۋ، اشىتۋ تەحنولوگياسى، ساقتاۋ ادىستەرى سياقتى زاماناۋي تاسىلدەرمەن تانىسادى.
ايتا كەتەيىك، قاراعاندىلىقتار قىمىز پىسكەن اجەيدىڭ ءۇش مەترلىك ءمۇسىنىن جاسادى.