استانادا تىلدەردى دامىتۋعا قوسىمشا 103 ميلليون تەڭگە ءبولىندى
استانا. KAZINFORM - استانا قالاسى ەكونوميكا جانە بيۋدجەتتى جوسپارلاۋ باسقارماسىنىڭ باسشىسى قايسار ماڭقارايەۆ قازاق جانە باسقا دا تىلدەردى دامىتۋعا قوسىمشا قاراجات بولىنگەنىن ايتتى.
«دەنە شىنىقتىرۋ جانە سپورت باسقارماسىنا رەسپۋبليكالىق جانە حالىقارالىق جارىستارعا قۇراما كوماندالاردى دايارلاۋعا جانە قاتىسۋعا، جان باسىنا شاققانداعى قارجىلاندىرۋعا مەملەكەتتىك الەۋمەتتىك تاپسىرىسقا، جاسوسپىرىمدەرگە ارنالعان سپورت مەكتەپتەرىنە جابدىق ساتىپ الۋعا جالپى سوماسى 3 ميلليارد 667 ميلليون تەڭگە قاراجات ءبولۋ كوزدەلىپ وتىر»، - دەدى قايسار ماڭقارايەۆ قوعامدىق كەڭەس وتىرىسىندا.
سونداي- اق، باسقارما باسشىسى تىلدەردى دامىتۋ جانە ارحيۆ ىستەرى باسقارماسىنا مەملەكەتتىك ءتىلدى جانە باسقا دا تىلدەردى دامىتۋعا قوسىمشا 103 ميلليون تەڭگە بولىنگەنىن ايتتى.
«سونىمەن قاتار كولىك جانە جول كولىك ينفراقۇرىلىمىن دامىتۋ باسقارماسىنا، كولىك ينفراقۇرىلىمىن دامىتۋعا جانە قوعامدىق كولىك تاسىمالداۋشىلارىنىڭ شىعىستارىن سۋبسيديالاۋعا قوسىمشا 25 ميلليارد تەڭگە قاراجات ءبولۋ ۇسىنىلىپ وتىر. كوممۋنالدىق شارۋاشىلىق باسقارماسىنا نوسەر كارىزدەرىنىڭ كۇتىمىنە، ونى تازارتۋعا «استانا سۋ ارناسى» اتموسفەرالىق جەرۇستى اعىندارىن جىبەرۋ مەن تازارتۋعا، سۋمەن جابدىقتاۋ جانە سۋ بۇرۋ جۇيەسىن دامىتۋعا قوسىمشا 14 ميلليارد 254 ميلليون تەڭگە قاراجات ءبولۋ سۇرالادى»، - دەيدى ق. ماڭقارايەۆ.