استانادا تۇركى مەملەكەتتەرىنىڭ سىرتقى ىستەر مينيسترلەرى باس قوستى
ق ر سىرتقى ىستەر مينيسترلىگىندە تۇركى مەملەكەتتەرى ۇيىمىنىڭ سىرتقى ىستەر مينسترلەرى كەڭەسىنىڭ جابىق وتىرىسى ءوتىپ جاتىر، دەپ حابارلايدى Kazinform.
سىرتقى ىستەر مينيسترلەرى كەڭەسىنىڭ وتىرىسىنا ت م ۇ-عا مۇشە مەلەكەتتەردىڭ، بايقاۋشى ەلدەردىڭ سىرتقى ىستەر مينيسترلەرى جانە حالىقارالىق ۇيىم وكىلدەرى قاتىسۋدا.
وتىرىستىڭ اشىلۋىندا ق ر سىرتقى ىستەر ءمينيسترى مۇرات نۇرتىلەۋ تۇركيالىق ارىپتەسى حاكان فيداندى تۇركيا رەسپۋبليكاسىنىڭ 100 جىلدىعىمەن قۇتتىقتادى.
باۋىرلاس تۇرىك ەلىنە ۇيلەسىم، پروگرەسس جانە ودان ءارى وركەندەۋ تىلەدى.
«ت م ۇ مەرەيتويلىق ونىنشى سامميتى جانە مينيسترلەر كەڭەسىنىڭ قازاقستاندا - تۇركى اتا-بابالارىنىڭ جەرىندە ءوتۋىنىڭ سيمۆولدىق ءمانى بار. 1993 -جىلى شىلدەدە تۇركىتىلدەس مەملەكەتتەردىڭ العاشقى سامميتى قازاقستاندا وتكەن ەدى. مەملەكەتتەرىمىزدىڭ باسشىلارى بۇگىن استانا اكتىسى مەن دەكلاراتسياسىن قابىلداپ، ۇيىمىمىز ءۇشىن جاڭا تاراۋىن اشۋ ءۇشىن جينالىپ وتىر. بۇل كورنەكتى قۇجاتتار ءبىزدىڭ كوشباسشىلارىمىزدىڭ تۇركى حالىقتارىنىڭ ورتاق تاريحىنا، تىلىنە، مادەنيەتىنە، داستۇرلەرى مەن قۇندىلىقتارىنا نەگىزدەلگەن جارقىن بولاشاققا دەگەن بىرلەسكەن كوزقاراسىن ايعاقتايدى»، - دەدى قازاقستاننىڭ سىرتقى ىستەر ءمينيسترى.
مۇرات نۇرتىلەۋدىڭ العى سوزىنەن كەيىن دەلەگاتسيا باسشىلارى الفاۆيت تارتىبىندە مالىمدەمە جاسايدى جانە ۇيىمعا مۇشە مەملەكەتتەر مەن باقىلاۋشىلار اتىنان قاتىساتىن ءاربىر سپيكەرگە ءسوز سويلەۋ ءۇشىن 7 مينۋت بەرىلەدى.
تۇركى ىنتىماقتاستىعى ۇيىمدارىنىڭ باسشىلارى مەن اقساقالدار كەڭەسىنىڭ ءتوراعاسىنا 3 مينۋت ۋاقىت بەرىلەدى.
وتىرىس ساعات 10.00-دە تۇركى مەملەكەتتەرى ۇيىمىنىڭ ءتيىستى قۇجاتتارى مەن شەشىمدەرىن قابىلداۋمەن اياقتالادى دەپ جوسپارلانعان.
وسىدان كەيىن تۇركى مەملەكەتتەرى ۇيىمىنىڭ سامميتى باعدارلاماسىنا سايكەس مينيسترلەر اقورداعا بارادى.
ايتا كەتەيىك، 2021 -جىلعى 12-قاراشادا ىستانبۇلدا وتكەن تۇركى تىلدەس ەلدەردىڭ ىنتىماقتاستىق كەڭەسى سامميتىندە تۇركى كەڭەسىنىڭ اتاۋى تۇركى مەملەكەتتەرىنىڭ ۇيىمى بولىپ وزگەرتىلدى.
بۇگىن ەلوردادا تۇركى مەملەكەتتەرى ۇيىمىنىڭ (ت م ۇ) مەرەيتويلىق X سامميتى وتەدى.
بۇل جيىنعا تۇركى مەملەكەتتەرى ۇيىمىنا مۇشە ازەربايجان، قىرعىزستان، تۇركيا، وزبەكستان پرەزيدەنتتەرى، سونداي-اق ت م ۇ-داعى باقىلاۋشى مەملەكەتتەر - ماجارستان مەن تۇرىكمەنستان باسشىلارى قاتىسادى.
سامميت «تۇركى ءداۋىرى» ۇرانىمەن وتەتىن جوعارى دەڭگەيدەگى پىكىرتالاستار ءۇشىن ماڭىزدى الاڭ بولادى.