استانادا گەرولد بەلگەردىڭ ەكى تومدىق جيناعىنىڭ تۇساۋكەسەرى ءوتتى

استانا. KAZINFORM - قازاقستان رەسپۋبليكاسىنىڭ ۇلتتىق اكادەميالىق كىتاپحاناسىندا قازاق ادەبيەتىنىڭ كورنەكتى اۋدارماشىسى، جازۋشى جانە پۋبليتسيست گەرولد بەلگەردىڭ 90 جىلدىعىنا وراي ەكى تومدىق «تاڭدامالىلار» كىتابىنىڭ تۇساۋكەسەرى ءوتتى.

وعان مادەنيەت جانە قوعام قايراتكەرلەرى، اقىن-جازۋشىلار، ادەبيەتتانۋشىلار مەن اۋدارماشىلار، سونداي-اق رەسەي ديپلوماتيالىق كورپۋسىنىڭ وكىلدەرى قاتىستى.

ءىس- شارادا ق ر م ا م ارحيۆ، قۇجاتتاما جانە كىتاپ ءىسى كوميتەتىنىڭ ءتوراعاسى رۋستام الي مينيستر ايدا بالايەۆانىڭ قۇتتىقتاۋ حاتىن وقىپ بەردى.

مينيستر قۇتتىقتاۋىندا گەرولد بەلگەردىڭ قازاق ادەبيەتى مەن مادەنيەتىن دارىپتەۋدەگى ادال قىزمەتى مەن كوپتىلدى مۇراسى كەلەشەك ۇرپاق ءۇشىن ماڭىزدى قۇندىلىق ەكەنى ايتىلعان.

«بۇل جيناق ق ر مادەنيەت جانە اقپارات مينيسترلىگى ۇيلەستىرەتىن «قوعامدىق ماڭىزى بار ادەبيەتتەردى باسىپ شىعارۋ جانە تاراتۋ» مەملەكەتتىك باعدارلاماسى اياسىندا جارىق كورىپ، ەلىمىزدىڭ كىتاپحانالارىنا تاراتىلادى. بۇدان بولەك بيىل بىرەگەي تۇلعاعا ارنالعان جۇزدەن استام رۋحاني ءىس-شارا ەلىمىزدىڭ تۇكپىر- تۇكپىرىندە كەڭىنەن اتالىپ وتۋدە. جىلدىڭ كەيىنگى شيرەگىنىڭ وزىندە گەرولد بەلگەردىڭ 90 -جىلدىق مەرەيتويى قارساڭىندا 32 ءىس-شارا جوسپارلانىپ، قالىڭ وقىرمانعا ۇسىنىلۋدا. مينيسترلىك تاراپىنان جازۋشىنىڭ شىعارماشىلىعى مەن ءومىر جولىن ناسيحاتتاۋ جۇمىستارى دا قارقىندى جۇرگىزىلۋدە. تەلەارنالار ارقىلى تاراعان «بىرەگەي» باعدارلاماسى، «ءبىز بىرگەمىز» روليگى، «نەيزداننىە پرويزۆەدەنيا گەرولدا بەلگەرا» سيۋجەتتەرىن ەرەكشە اتاپ وتكىم كەلەدى»، - دەلىنگەن قۇتتىقتاۋ حاتتا.

سونداي-اق، جيىندا جازۋشىنىڭ قىزى يرينا كوۆاليەۆا- بەلگەردىڭ ءىس-شارا ۇيىمداستىرۋشىلارىنا العىس بىلدىرگەن حاتى وقىلدى.

«قازاقستاننىڭ ءار وڭىرىندە گەرولد بەلگەردىڭ 90 جىلدىق مەرەيتويى اياسىندا كوپتەگەن ءىس-شارالار وتكىزىلىپ جاتىر. سونداي ماڭىزدى شارانىڭ ءبىرى - ەكى تومدىق جيناقتىڭ جارىق كورۋى. ءبىرىنشى تومدا ەڭ ۇزدىك اڭگىمەلەرى مەن شىعارمالارى جيناقتالعان. ەكىنشى توم ومىرىندەگى اسا قىمبات جاندارعا، بىرگە ءومىر سۇرگەن، ءوزى تالانتىن جوعارى باعالاعان ادامدارعا ارنالعان. ونىڭ شىعارماشىلىعى مەن ومىرىنە قىزىعۋشىلىق تانىتىپ، ناسيحاتتاپ جاتقاندارىڭىز ءۇشىن شەكسىز العىس بىلدىرەمىز»، - دەدى ي. كوۆاليەۆا-بەلگەر.

گەرولد بەلگەردىڭ جاڭا ەكى تومدىق «تاڭدامالىلار» جيناعىنا 140-تان اسا شىعارمالارى مەن اۋدارمالارى ەنىپ، ءارقايسىسى 3000 دانامەن جارىققا شىقتى.