استانادا رەسپۋبليكا كۇنىنە وراي قانداي ءىس-شارالار وتەدى

استانا. KAZINFORM - ەلىمىزدە 25-قازان كۇنى ۇلتتىق مەرەكە - رەسپۋبليكا كۇنى اتاپ وتىلەدى. وسى ايتۋلى كۇننىڭ قۇرمەتىنە استانادا 100-دەن استام مادەني-بۇقارالىق، ءبىلىم بەرۋ، سپورتتىق جانە الەۋمەتتىك ءىس-شارا وتكىزىلەدى.

ولاردىڭ اراسىندا مەرەكەلىك كونسەرتتەر، اۆتوشەرۋلەر، كورمەلەر، بالالارعا ارنالعان كورنەكتى نىساندار بويىنشا ەكسكۋرسيالار، دوڭگەلەك ۇستەلدەر، ۇلتتىق سپورت تۇرلەرى بويىنشا تۋرنيرلەر جانە باسقا دا كوپتەگەن ءىس-شارالار بار، دەپ حابارلايدى ەلوردا اكىمدىگىنىڭ رەسمي سايتى.

ءىس-شارالار ورتالىق الاڭداردا دا، ءىرى نىسانداردا دا، تۇرعىن الاپتاردا دا، ءبىلىم بەرۋ ۇيىمدارىندا جانە ت. ب. وتەدى، سونداي-اق رەسپۋبليكا كۇنى قارساڭىندا حالىقتىڭ الەۋمەتتىك وسال توپتارىنا 1 مىڭنان استام ازىق-تۇلىك سەبەتتەرى تاراتىلاتىن بولادى.

مەرەكە اياسىندا ەلوردادا جانە ءاربىر اۋداندا ءتۇرلى سالانىڭ ەڭبەك سىڭىرگەن قىزمەتكەرلەرى، ەڭبەك ارداگەرلەرى، بەلسەندى ازاماتتارى ماراپاتتالادى.

بۇل كۇندەرى ءبىلىم بەرۋ ۇيىمدارىندا دوڭگەلەك ۇستەلدەر، پىكىرتالاس تۋرنيرلەرى، كورمەلەر، تانىمال تۇلعالارمەن كەزدەسۋلەر، كونفەرەنسيالار، شىعارماشىلىق كونكۋرستار، ەسسەلەر مەن وقىرماندار كونكۋرستارى وتكىزىلەدى.

19-قازان كۇنى ساعات 9.00-دە سارى ارقا اۋدانىندا «Koktal Run» جۇگىرۋ مارافونى ۇيىمداستىرىلادى. وعان جەڭىل اتلەتيكامەن اينالىساتىن ءاربىر تۇرعىن قاتىسا الادى. مارافون سوڭىندا بالالار مەن ەرەسەكتەر اراسىندا 1-2-3 -ورىن العان قاتىسۋشىلاردى ماراپاتتاۋ وتەدى. مارافون جەڭىمپازدارى مەن جۇلدەگەرلەرىنە گراموتالار، مەدالدار مەن باعالى سىيلىقتار ۇسىنىلادى.

سول كۇنى ساعات 18:00-دە ە. راحماديەۆ اتىنداعى مەملەكەتتىك اكادەميالىق فيلارمونيادا «ۇلى شەبەرلەر مۇراسى» ۇرمەلى وركەسترىنىڭ مەرەكەلىك كونسەرتى وتەدى.

23-قازان كۇنى «جاستار» سارايىندا ساعات 19:00-دە رەسپۋبليكا كۇنىنە ارنالعان «جىگەر» ەسترادالىق-دجاز انسامبلىنىڭ «اتامەكەنىم» مەرەكەلىك كونسەرتى وتەدى.

سول كۇنى سارى ارقا اۋدانىندا يۋبيلەينايا كوشەسى، 22 جانە جەڭىس داڭعىلى، 34 بويىنشا بۇرىنعى بوس ورىندا جاڭا قوعامدىق كەڭىستىك اشىلادى. سونداي-اق، قوسشىعۇل ۇلى كوشەسى، 17 جانە 19 اۋلالارىنىڭ اباتتاندىرىلۋىنا ارنالعان مەرەكە وتەدى.

25-قازاندا ساعات 15.00-دەن 16.30-عا دەيىن ورتالىق الاڭدا جانە ەلوردا ساياباعىندا قازاق ەستراداسىنىڭ جۇلدىزدارى مەن بي انسامبلدەرىنىڭ قاتىسۋىمەن مەرەكەلىك كونسەرتتىك باعدارلامالار وتەدى. ءىس-شارا بارىسىندا «گىر كوتەرۋ»، «اسىق اتۋ»، «قول كۇرەس» جانە ت. ب ۇلتتىق ويىندار دا وتكىزىلەدى.

25-قازان - رەسپۋبليكا كۇنى قوشقاربايەۆ، 29/1 مەكەنجايى بويىنشا بەلسەندى ۇزاق ءومىر ءسۇرۋ ورتالىعىندا قارتتار اراسىندا دويبىدان جارىس وتەدى.

25-26 -قازان كۇندەرى ءا. مامبەتوۆ اتىنداعى مەملەكەتتىك دراما جانە كومەديا تەاترىندا ساعات 19:00-دە اۆتور مۇحتار شاحانوۆتىڭ قاتىسۋىمەن «تاناكوز» سپەكتاكلىنىڭ پرەمەراسى وتەدى.

ال 26 جانە 27 -قازاندا ساعات 19:00-دە جاس كورەرمەننىڭ مۋزىكالىق تەاترىندا «گاۋحارتاس» سپەكتاكلى كورسەتىلەدى.

اۆتور

اسحات رايقۇل