استانادا قىزدى قوناق ۇيگە اپارعان جىگىت كۇتپەگەن جاعدايعا تاپ بولدى

استانا. KAZINFORM - استاناداعى كەزدەيسوق تانىستىق 21 جاستاعى الماتىلىققا 7 مىڭ دوللاردان اسا شىعىن كەلتىردى، دەپ حابارلايدى Polisia.kz.

جاس جىگىت تۇنگى كوڭىل كوتەرۋ مەكەمەسىندە بولىپ، سول جەردە قىزبەن تانىسقان. العاشقى تانىستىق جاستاردى جاقىنداستىرعانى سونشالىق، ولار باسقا باردا كوڭىل كوتەرۋدى جالعاستىرىپ، سوڭىندا قوناق ۇيگە بارعان.

جىگىت قىزعا بايقاۋسىزدا سومكەسىندەگى 10 مىڭ دوللارىن كورسەتكەن. سودان كەيىن ول قوناق ءۇي بولمەسىندە ۇيىقتاپ قالعاننان كەيىن قىز 7200 دوللارىن الىپ، كەتىپ قالعان. ويانعان سوڭ كولىك ساتىپ الۋدى جوسپارلاعان قاراجاتىنىڭ جوعالعانىن بىلگەن جىگىت بىردەن پوليتسياعا حابارلاسقان.

جەدەل ىزدەستىرۋ ءىس-شارالارى بارىسىندا ەسىل اۋدانىنىڭ پوليتسيا قىزمەتكەرلەرى ۇرلىق جاسادى دەگەن كۇدىكپەن 25 جاستاعى قىزدى ءبىر تاۋلىك ىشىندە انىقتادى. اتالعان فاكتى بويىنشا قىلمىستىق ءىس قوزعالىپ، قىز كىناسىن مويىندادى.

پوليتسيا قاراجاتتىڭ ءبىر بولىگىن تاركىلەدى.