استانادا قۇستىڭ 84 ءتۇرى مەكەندەيدى

استانا. قازاقپارات - قازاقستان بيوالۋان تۇرلىلىكتى ساقتاۋ قاۋىمداستىعى جۇرگىزگەن ساناقتىڭ ارالىق ناتيجەسى وسىنداي. ماماندار مەگاپوليستەن قىزىل كىتاپقا ەنگەن قاناتتىلاردى دا كەزدەستىرگەن. جوبا ءالى دە جالعاسادى.

استانا اۋماعىنداعى قۇستار الەمى بۇعان دەيىن زەرتتەلمەگەن. بىلتىر العاش رەت قازاقستان بيوالۋانتۇرلىلىكتى ساقتاۋ قاۋىمداستىعى ساناق جۇرگىزۋدى قولعا الدى. باستاماعا قولداۋ بىلدىرگەندەر كوپ. اسىرەسە ستۋدەنت ۆولونتەرلاردىڭ قىزىعۋشىلىعى ازاماتتىق عىلىمنىڭ دامۋىنا سەرپىلىس بەرگەندەي.

ماماندار قۇستاردىڭ ەڭ كوپ توپتاناتىن ورنى ورتالىق ساياباق، پرەزيدەنت، ترياتلون، عاشىقتار جانە جەرۇيىق ساياباعى، سونداي-اق كىشى تالدىكول ماڭى ەكەنىن ايتادى. ازىرگە 84 قۇس ءتۇرى تىركەلدى.

ەڭلىك قايىرسىنوۆا، قازاقستان بيوالۋانتۇرلىلىكتى ساقتاۋ قاۋىمداستىعىنىڭ قىزمەتكەرى:

- سولاردىڭ اراسىندا ەڭ كوپشىلىگى كۇندەلىكتى كورىپ جۇرەتىن تورعايلار بولدى، شىمشىق بولدى، ياعني كۇندەلىكتى كورىپ جۇرەتىن تۇرلەر كوبىرەك بولدى. قوسىمشا سيرەك كەزدەسەتىن قۇستار دا كەزدەسىپ وتىردى. مىسالى، كىشى تالدىكول بويىندا ءبىزدىڭ ساناقشىلار قىزىل كىتاپقا ەنگەن سيرەك كەزدەسەتىن قۇستاردى دا كەزدەستىردى. سونىڭ ءبىرى اقباس ۇيرەك دەپ ايتۋعا بولادى.

قۇستار ەجەلدەن ادامنىڭ دوسى سانالادى. سوندىقتان بولار، مەگاپوليستەن دە جايلى ورىن تاۋىپ، الاڭسىز تىرشىلىك كەشىپ ءجۇر. ماماندار: «استاناداعى قاناتتىلار ءتۇرىنىڭ ءالى دە كوپ بولۋى مۇمكىن»، - دەيدى. قازىر ساناققا قاۋىمداستىقتىڭ عىلىمي قىزمەتكەرلەرى، ۆولونتەرلار جانە ستۋدەنتتەر قاتىسىپ جاتىر.

البەتتە، زەرتتەۋ جۇمىستارى قۇستار قايتىپ كەلەتىن شاق، كوكتەمدە قىزادى. دەمەك، قالانىڭ ورنيتوفاۋناسىن زەرتتەۋ جوباسىنا ۆولونتەرلار ءالى دە كەرەك.

استاناعا قىستاۋ ءۇشىن دە ۇشىپ كەلەتىن قۇستار بار. ولاردىڭ قاتارىندا كادىمگى سۋىقتورعاي، شىمشىق، سامىر، ت. ب كەزدەسەدى.

24.kz