استانادا قۇرىلىسى 11 جىلعا سوزىلعان تۇرعىن ءۇي كەشەنى اياقتالدى
استانا. KAZINFORM - استانادا قۇرىلىسى 11 جىلعا سوزىلعان تاعى ءبىر نىسان اياقتالدى. «Future home» كوپپاتەرلى تۇرعىن ءۇي كەشەنىنىڭ قۇرىلىسى 2013 -جىلى باستالعان. نىساننىڭ ءوزى 2017 -جىلى پروبلەمالى دەپ تانىلدى. ۇلەسكەرلەر سانى - 200 گە جۋىق وتباسى. بۇل تۋرالى ەلوردا اكىمى جەڭىس قاسىمبەك Instagram-داعى پاراقشاسىندا جازدى.
نىساندى ە ق ك-گە وتكىزۋ كەزىندە 4 جانە 7-قاباتتارى عانا سالىنعان. بۇل ءۇيدى اياقتاۋ ءۇشىن كوپتەگەن جۇيەلى جۇمىس، ونىڭ ىشىندە ينجەنەرلىك جەلىلەر بويىنشا دا جۇمىستار جۇرگىزىلدى. بۇگىن ءتورت بلوكتىڭ تۇرعىندارىنا پاتەر كىلتى تابىستالدى. ال بەسىنشى بلوكتىڭ ۇلەسكەرلەرى جاقىن ارادا باسپانالى بولادى.
«وسىعان دەيىن مەملەكەتتىڭ قولداۋىنىڭ ارقاسىندا قۇرىلىسى ۇزاققا سوزىلعان 140 تان استام تۇرعىن ءۇي كەشەنى اياقتالدى. وسىلايشا 15,5 مىڭعا جۋىق ۇلەسكەر وتباسىنىڭ پروبلەماسى شەشىلدى. بيىلعا قۇرىلىسى ۇزاققا سوزىلعان 10 ءۇي قالادى. ولاردى وسى جىلدىڭ 1-2-توقسانىندا اياقتايمىز. ءاربىر نىسان بويىنشا قادامدىق ءىس-شارالار جوسپارى بار. قۇرىلىسى ۇزاققا سوزىلعان نىسانداردىڭ اياقتالۋى مەملەكەت باسشىسىنىڭ باقىلاۋىندا»، - دەپ جازدى ەلوردا اكىمى.