استانادا قاتتى جەلدەن كەيىن قالپىنا كەلتىرۋ جۇمىستارى جۇرگىزىلىپ جاتىر

ەلوردادا 18-قاراشا كۇنى كەشكى ۋاقىتتا ۇيىتقىپ سوققان قاتتى جەل قۇرىلىستارعا زيان كەلتىرىپ، اعاشتاردى قۇلاتىپ، بەلگىلەردى جۇلىپ اكەتتى. قالانىڭ كوممۋنالدىق قىزمەتتەرى اۋا رايىنىڭ قولايسىزدىعىنا بايلانىستى كۇشەيتىلگەن رەجيمگە كوشتى، دەپ حابارلايدى Kazinform استانا اكىمدىگىنىڭ رەسمي سايتىنا سىلتەمە جاساپ.

كوممۋنالدىق قىزمەتتەر اۋدان اكىمدىكتەرىمەن بىرلەسىپ، اپاتتىڭ سالدارىن جويۋ جانە قالپىنا كەلتىرۋ جۇمىسىن جۇرگىزىپ جاتىر. وتكەن تاۋلىكتە استانا توتەنشە جاعدايلار دەپارتامەنتىنىڭ قىزمەتكەرلەرى راستالماعان 3 فاكتى بويىنشا 28 رەت شىقتى، 10 ءورت وقيعاسى، 12 اۆاريالىق- قۇتقارۋ جۇمىسى جانە ت. ب.

ماسەلەن، ۇركەر ەلدى مەكەنىندە اۋا رايىنىڭ ناشارلاۋىنا بايلانىستى ۇلتتىق ۇلان اسكەري ءبولىمىنىڭ بەس قاباتتى كازارما عيماراتىنىڭ شاتىرى بۇزىلدى. ونىڭ جالپى الاڭى 1500 شارشى مەتردى قۇرادى.

فوتو: استانا قالاسىنىڭ اكىمدىگى

بايقوڭىر اۋدانىندا اۋا رايىنىڭ قولايسىزدىعى كەزىندە 7 اۆتوبۋس ايالداماسى وپىرىلىپ، 6 قورشاۋ زاقىمدالدى. سول سياقتى 6 اعاش قۇلادى.

سارىارقا اۋدانىندا ەكى قاباتتى ءۇيدىڭ شاتىرى بۇزىلىپ، ارتىنشا «شكولنايا» مەكەمەسىنىڭ ەلەكتر ەنەرگياسى ءۇزىلدى. استانا- اەك ارقىلى ەلەكترمەن جابدىقتاۋ تولىعىمەن قالپىنا كەلتىرىلدى.

الماتى اۋدانىندا 8 جول بەلگىسى، 1 جارىقتاندىرۋ باعاناسى، 5 شام، قورشاۋ جانە ت. ب. ءبۇلىندى.

فوتو: استانا قالاسىنىڭ اكىمدىگى

«MEGA Silk Way» ساۋدا ورتالىعىنىڭ نەگىزگى كىرەبەرىسىنىڭ جانىنداعى كوشەدە قاتتى جەلدەن جارنامالىق باننەر جۇلىنىپ، ايەل ادامنىڭ ۇستىنە ءتۇستى. ول №2-اۋرۋحاناعا جەتكىزىلدى. دارىگەرلەر تەكسەرگەننەن كەيىن ۇيىنە جىبەرىلدى، جاعدايى قاناعاتتانارلىق.

نۇرا اۋدانىندا «Evolution» ت ك، «تەحنيكۋم» ت ك قۇرىلىس الاڭدارىندا، سىعاناق- انەت بابا كوشەلەرىنىڭ قيىلىسىندا، قابانباي باتىر داڭعىلى، 29/4، قورعالجىن تاس جولى، 20ب، وماروۆ كوشەسى، 21/1 جانە تۇران داڭعىلى، 57/1-مەكەنجايلارىندا قورشاۋلاردى قالپىنا كەلتىرۋ جۇمىسى جۇرگىزىلىپ جاتىر.

كوممۋنالدىق قىزمەتتەر قاتتى جەلدەن كەيىن قالپىنا كەلتىرۋ جۇمىسىن جۇرگىزىپ جاتىر.