استانادا قاتتى جەل تۇرعىنداردى ابىگەرگە سالىپ جاتىر
استانا. KAZINFORM - كەشەدەن بەرى ەلوردادا قاتتى جەل سوعىپ، قولايسىز اۋا رايى قالا تۇرعىندارىن ابىگەرگە سالدى.
قاتتى جەلدىڭ ەكپىنىنەن ادامدار ۇشىپ كەتە جازدادى، الەۋمەتتىك جەلىدە تاراعان ۆيدەولاردان قاراساق، كەيبىر عيماراتتاردىڭ شاتىرى، قابىرعالارى مەن قورشاۋلارى قۇلاعان.
«وقيعا ورنىنا اۋداندىق توتەنشە جاعدايلار ينسپەكتورلارى شىقتى. اۋا رايىنىڭ قولايسىزدىعىنان بولعان جاعدايدى راستاپ، بەلگىلەپ جاتىر. ال شاتىردىڭ قۇلاعان بولشەكتەرىن استانا-تازالىق جۇمىسشىلارى جينادى»، - دەگەن حابار الدىق قالالىق توتەنشە جاعدايلار دەپارتامەنتىنەن.
ايتا كەتسەك، ازىرگە قاتتى جەلدەن زارداپ شەككەن ادامدار تۋرالى اقپارات جوق، وسى ورايدا ت ج د قوسىمشا اقپارات بەرىلەتىنىن ايتتى.
سونداي- اق، بۇگىن (7-قاراشا) اۋا رايىنىڭ قولايسىزدىعىنا بايلانىستى ەكىنشى اۋىسىمنىڭ 0-9 سىنىپ وقۋشىلارى قاشىقتان وقىتۋ فورماتىنا اۋىستىرىلدى. بۇل تۋرالى قالالىق ءبىلىم باسقارماسى حابارلادى.
اكىمدىكتىڭ مالىمەتىنشە، كوممۋنالدىق قىزمەتتەر كۇشەيتىلگەن رەجيمدە جۇمىس ىستەپ جاتىر.
«تاڭەرتەڭ قالا كوشەلەرىن قاردان تازارتۋعا 2000 نان استام جول جۇمىسشىسى مەن 750 گە جۋىق ارنايى تەحنيكا شىقتى. ءبىرىنشى كەزەكتە ورتالىق كوشەلەردە، جولاۋشىلار كولىگى مارشرۋتتارىندا، ايالدامالار مەن تروتۋارلاردا تازالاۋ جۇمىستارى جۇرگىزىلۋدە. قالادا بىرنەشە جابدىقتالعان قار پوليگوندارى بار. وندا ساموسۆال تەحنيكاسىنىڭ نومىرلىك بەلگىلەرىن وقۋ جۇيەسىمەن جابدىقتالعان، بەينەباقىلاۋ كامەرالارى ورناتىلعان، جارىقتاندىرۋ قوسىلعان»، - دەيدى ەلوردا اكىمدىگىنەن.
«قازگيدرومەت» ر م ك مالىمەتىنشە، 7-قاراشادا استانادا قار، كوكتايعاق جانە بوران بولادى. سينوپتيكتەر وڭتۇستىك- باتىستان 23-28 م/س، كەيدە 30 م/س دەيىن جەل سوعادى دەپ بولجاپ وتىر.
وسى ورايدا قالا باسشىلىعى ەلوردا تۇرعىندارى مەن قوناقتارىنان جولداردا اباي بولۋدى، قاۋىپسىزدىك ەرەجەلەرىن ساقتاۋدى، داۋىلدى ەسكەرتۋ بولعان جاعدايدا الىس ساپارلاردان باس تارتۋدى سۇرايدى.