استانادا قاتەرلى ىسىكتى راديواكتيۆتى يودپەن ەمدەي باستادى

استانا. قازاقپارات- استانادا قالقانشا بەزىنىڭ قاتەرلى ىسىگىن راديواكتيۆتى يودپەن ەمدەۋ ءادىسى قولدانىلادى، دەپ حابارلايدى 24KZ.

بۇعان دەيىن تەراپيا تەك سەمەيدەگى يادرولىق مەديتسينا ورتالىعىندا جۇرگىزىلىپ كەلدى. ەندى بۇل ەم-دوم ەلورداداعى ۇلتتىق عىلىمي ونكولوگيا ورتالىعىندا دا قولجەتىمدى. دارىگەرلەر تاياۋ كۇندەرى قالقانشا بەزى قاتەرلى ىسىگىنە شالدىققانداردى يود تەراپيامەن ەمدەۋگە كىرىسەدى.

دايىندىق قالاي جانە بۇل ءادىستىڭ ەرەكشەلىگى نەدە؟ قالقانشا بەزىنىڭ قاتەرلى ىسىگى قازىر كەڭ تارالعان. ءبىزدىڭ ەلدە عانا ەمەس، بۇكىل الەمدە وسى دەرتتىڭ تارالۋ جيىلىگى ارتىپ بارادى. دارىگەرلەر بۇنى دياگنوستيكانىڭ ارتۋىمەن بايلانىستىرىپ وتىر.

«قالقانشا بەزىنىڭ قاتەرلى ىسىگى كەزىندە نەگىزگى ەم - وپەراتسيا»، - دەيدى دارىگەرلەر. ءبىراق 16 -ماۋسىمنان باستاپ استاناداعى ۇلتتىق عىلىمي ونكولوگيا ورتالىعىندا وسى اۋرۋمەن كۇرەستە راديواكتيۆتى يود تەراپياسى قولدانىلا باستايدى.

دۋلات سەرىكباي ۇلى، ۇ ع و و حيرۋرگ-ونكولوگى:

- راديواكتيۆتى يود تەراپياسى ول وپەراتسيادان كەيىنگى قوسىمشا ەم بولىپ تابىلادى. ونىڭ نەگىزگى ماقساتى راديواكتيۆتى يود پرەپارات قانعا ءسىڭىپ، قالقانشا بەزىنىڭ قاتەرلى كلەتكالارىن ولتىرەدى. ناۋقاس ادام ءبىر ستاقان، شامامەن 200 م ل يودتى ىشەدى. ول سۇيىقتىق تۇرىندە. ءدامى، ءيىسى جوق. سونى ىشەدى. ىشكەن سوڭ ارنايى پالاتادا بولادى. سوسىن ۋاقىت وتكەن سوڭ ورگانيزمدە قاتەرلى ىسىك تىندەرى قالدى ما، بار ما، جوق پا - سونى انىقتاۋ ءۇشىن بۇكىل دەنەسىنە سكانەرلەۋ زەرتتەۋى جۇرگىزىلەدى.

راديواكتيۆتى يود تەراپياسى قالقانشا بەزىنىڭ قاتەرلى ىسىگى ۇلكەن بولسا، راك تىندەرى دەنەگە تارالىپ، مەتاستاز بەرگەن جاعدايدا قولدانىلادى. مۇنداي ەمنەن ءوتۋ ءۇشىن پاتسيەنتتەر قۇرامىندا يودى كوپ تاعامداردى تۇتىنباي، ارنايى ديەتا ساقتاپ، دايىندالادى. بۇل تەراپيانىڭ اسەرىن كۇشەيتۋ ءۇشىن جاسالادى.

بەرىك كارىبايەۆ، ۇ ع و و راديويزوتوپتىق دياگنوستيكا بولىمشەسىنىڭ دارىگەرى:

- بولىمشەدە 8 جەكە پالاتا بار. ءاربىر پالاتادا ناۋقاس جالعىز عانا جاتادى. ناۋقاس بىزگە دۇيسەنبىدە گوسپيتاليزاتسياعا كەلەدى. سوسىن يودتى سۇيىق تۇرىندە قابىلدايدى. سوسىن ەمدەۋ كابينەتىنەن وسى پالاتاعا جاتادى. ءاربىر اپتا ءبىز 8 ناۋقاستى قابىلدايمىز. ايىنا 32 ناۋقاس بولادى. جازدا بىزگە يود اپتا سايىن الماتىداعى يادرولىق فيزيكالىق ينستيتۋتتان اكەلىنەدى. بولىمدە قاۋىپسىزدىك قاتاڭ باقىلانادى.

راۋديواكتيۆتى پرەپاراتپەن ەمدەۋ كەلەسى اپتادا باستالاتىندىقتان، ءتۇسىرىلىم توبىنا بولىمشەگە كىرۋگە رۇقسات ەتىلدى. ءبىراق بۇل ەم دوم ىسكە قوسىلعان سوڭ ىشتەگى مامانداردىڭ ءوزى ارنايى كيىممەن جۇرەدى. ال تەراپيادان وتكەن ناۋقاستار 24 ساعات باقىلانادى.

قۇمار شىدەرباي، ۇ ع و و رادياتسيالىق قاۋىپسىزدىك جانە فيزيكالىق قورعانىس قىزمەتىنىڭ رادياتسيالىق قاۋىپسىزدىكتى باقىلاۋ ينجەنەرى:

- رادياتسيالىق قاۋىپ جوق. وسى بولىمشە ىسكە قوسىلعاننان كەيىن مۇنداعى ناۋقاستار 5 كۇن يزولياتسيادا بولعاننان كەيىن ولاردىڭ سىرتقا شىعۋىن رادياتسيالىق قاۋىپسىزدىك قىزمەتى جۇزەگە اسىرادى. ءبىر مەتر قاشىقتا ناۋقاستاردا رادياتسيالىق فون 20 ميكروزيۆەرتتەن اسپاۋ كەرەك. سونداي دارەجەلەر بولسا، ناۋقاس ۇيگە قايتارىلادى.

جىلىنا قالقانشا بەزى قاتەرلى ىسىگىنە بايلانىستى ۇلتتىق عىلىمي ونكولوگيا ورتالىعىندا 150 وپەراتسيا جاسالادى. ال قوسىمشا ەم وسى وپەراتسيالاردىڭ تيىمدىلىگىن ارتتىرىپ، سىرقاتپەن كۇرەستى جاڭا دەڭگەيگە كوتەرەدى دەپ كۇتىلىپ وتىر.