استانادا مەملەكەت جانە قوعام قايراتكەرى نۇرلان بالعىمبايەۆقا كوشە اتاۋى بەرىلدى
استانا. KAZINFORM - ەلوردادا مەملەكەت جانە قوعام قايراتكەرى نۇرلان بالعىمبايەۆقا كوشە اتاۋى بەرىلدى. بۇگىن اتالعان كوشەنىڭ جانە وسى كوشە بويىنا ورناتىلعان ەسكەرتكىش-تاقتانىڭ اشىلۋى ءوتتى. بۇل تۋرالى قالا اكىمدىگى حابارلادى.
ءىس-شاراعا استانا قالاسى اكىمدىگىنىڭ، ەنەرگەتيكا مينيسترلىگىنىڭ وكىلدەرى، مۇناي-گاز سالاسىنىڭ ارداگەرلەرى، زيالى قاۋىم وكىلدەرى جانە كورنەكتى تۇلعانىڭ وتباسى مەن تۋعان تۋىستارى قاتىستى.
اتالعان كوشە ەلوردانىڭ ەسىل اۋدانىندا ورنالاسقان. ۇزىندىعى - 1100 م. تۇركىستان كوشەسىنەن باستالىپ، ۇلى دالا داڭعىلىندا اياقتالادى.
كوشەنىڭ اشىلۋىندا العاشقى بولىپ ءسوز العان ەنەرگەتيكا ءمينيسترىنىڭ ورىنباسارى الىبەك جاماۋوۆ نۇرلان بالعىمبايەۆتىڭ تاۋەلسىز قازاقستاننىڭ دامۋىنا قوسقان وراسان زور ۇلەسىن اتاپ ءوتتى. مۇناي-گاز سالاسىنىڭ مامانى رەتىندە جەرگىلىكتى كادرلاردى دايارلاۋ، زاماناۋي تەحنولوگيالاردى ەنگىزۋ ارقىلى مۇناي-گاز كەن ورىندارىن بارلاۋ، يگەرۋ، كوپتەگەن كاسىپورىن اشۋ سياقتى مۇناي سالاسىنىڭ ورلەۋىنە باعىتتالعان قىرۋار جۇمىس اتقارعانىن ايتتى.
استانا قالاسى اكىمىنىڭ ورىنباسارى ەسەت بايكەن مەرەكەلىك ءىس-شاراعا قاتىسىپ، ءسوز سويلەدى.
«بۇگىن - شاھارىمىزدىڭ قوعامدىق-ساياسي ومىرىندە ايتۋلى كۇن. مەملەكەت باسشىسىنىڭ تاپسىرماسىنا سايكەس ەلوردا كوشەسىنە تاريحي تۇلعا، كورنەكتى مەملەكەت جانە قوعام قايراتكەرى نۇرلان بالعىمبايەۆتىڭ ەسىمى بەرىلىپ وتىر. بۇل كوشە قالا تۇرعىندارى مەن قوناقتارى كوپ جۇرەتىن ورتالىقتا ورنالاسقان. نۇرلان وتەپ ۇلى تاۋەلسىز قازاقستان تاريحىندا قاجىرلى ەڭبەك اتقارعان ساليقالى ساياساتكەر، مەملەكەتشىل تۇلعا ەدى. اسىرەسە ەل ۇكىمەتىن باسقارعان كەزدە كوپتەگەن يگى رەفورمالاردى قولعا الىپ، جۇمىستى جاقسارتۋعا كوپ ۇلەس قوستى. ال مۇناي-گاز سالاسىنا جەتەكشىلىك ەتكەن جىلدارى ەلدىڭ ينۆەستيتسيالىق الەۋەتىن كوتەرىپ، سالاعا تىڭ سەرپىن بەردى. ول سانالى عۇمىرىن ەل يگىلىگىنە، مۇناي-گاز سالاسىن دامىتۋعا ارناپ، ابىرويمەن عۇمىر كەشتى. ءومىرىنىڭ ءبىراز بولىگىن ەلوردادا وتكىزدى. وسى قالادا ءجۇرىپ، ماڭىزدى شەشىمدەر قابىلدادى. اتقارعان كوپ ءىسى تاۋەلسىز ەل تاريحىنا التىن ارىپپەن جازىلعانى ءسوزسىز. ەلگە قىزمەت ەتكەن قايراتكەرلەردى ۇلىقتاۋ، جاس ۇرپاققا ناسيحاتتاۋ - قاجەت ءىس. وسى ارقىلى مىقتى ازاماتتار بۋىنىن تاربيەلەي الامىز. نۇرلان وتەپ ۇلىنىڭ ەسىمى ەشقاشان ۇمىتىلمايدى دەپ سەنىممەن ايتا الامىن»، - دەدى ەسەت بايكەن.
بۇعان دەيىن حابارلانعانداي، 2050-جىلى استانادا حالىق سانى 3,5 ميلليون ادامعا جەتۋى مۇمكىن.