استانادا مادەنيەت سالاسىنداعى ايەلدەردى قولداۋ ورتالىعى اشىلدى

استانا. قازاقپارات - Rixos President Hotel قوناقۇيىندە ART QALQA (AQ) مادەنيەت سالاسىنداعى ايەلدەردى قولداۋ ورتالىعىنىڭ تۇساۋكەسەرى ءوتتى.

ورتالىقتىڭ العاشقى ءىس-شاراسى - سۋرەتشى اسەمگۇل جاناحمەتوۆانىڭ «الەم - ايەل جانارىندا» اتتى كورمەسى بولدى. سۋرەتشى تۋىندىلارى قازاقتىڭ ءداستۇرلى مادەنيەتى مەن زاماناۋي سۋرەت ونەرى ەلەمەنتتەرىن توعىستىرادى.

ءىس-شارا شىعارماشىلىق سالاسىنداعى ايەلدەردى - جازۋشىلاردى، سۋرەتشىلەردى، مۋزىكانتتاردى، ارتىستەردى جانە بيزنەس، ۇكىمەت، پارلامەنت، ەلشىلىكتەر مەن رەسپۋبليكالىق، حالىقارالىق ۇيىم وكىلدەرىن ءبىر شاڭىراق استىنا جينادى.

قازاقستانداعى ۇلىبريتانيا ەلشىسى كەتي ليچ قىزداردىڭ باستاماسىنا قولداۋ ءبىلدىرۋ ءۇشىن ارنايى كەلدى. ول Art Qalqa جۇمىسى مەن جوسپارلارى جايلى ورتالىق وكىلدەرىمەن، سۋرەتشىمەن ونىڭ شىعارماشىلىعى جايلى پىكىر الماستى.

كەشكە قاتىسقان تۇركيا جانە ا ق ش ەلشىلىك وكىلدەرى دە ايەلدەر شىعارماشىلىعىن قولدايتىن ورتالىقتىڭ قۇرىلۋىنا قاتىستى جىلى لەبىزدەرىن ءبىلدىردى. تۇركيا ەلشىلىك وكىلدەرى ەكى ەل اراسىندا الدا كوركەمسۋرەت بويىنشا وتەتىن شارالاردان حاباردار ەتتى.

سونداي-اق، قازاقستان ىسكەر ايەلدەر قاۋىمداستىعى، قازاقستان حالىقتار اسسامبلەياسى جانىنداعى رەسپۋبليكالىق انالار كەڭەسى وكىلدەرى دە شىعارماشىلىق ايەلدەردى قولداۋ بويىنشا پىكىرلەرىن ورتاعا سالدى.

كەشتىڭ باستى ماقساتى - كرەاتيۆ يدەيالارمەن الماسۋ جانە ولاردى ىسكە اسىرۋ مۇمكىندىكتەرىن تالقىلاۋ ءۇشىن نەتۆوركينگ الاڭ قۇرۋ.

AQ ورتالىعىنىڭ ميسسياسى ۇلتتىق جانە حالىقارالىق دەڭگەيدە ايەلدەردىڭ شىعارماشىلىق جوبالارىن ىلگەرىلەتۋ ارقىلى ينكليۋزيۆتى، اشىق جانە كوركەيگەن قوعام قۇرۋعا ىقپال ەتۋ. قازىردىڭ وزىندە يتاليا، تۇركيا جانە باسقا ەلدەردەگى حالىقارالىق كورمە، فەستيۆالدەر جانە ءبىلىم بەرۋ باعدارلامالارىنا قاتىسۋ، حادىقارالىق ۇيىمدارمەن بايلانىس ورناتۋ بويىنشا كەلىسىمدەرگە كەلۋدە.

ورتالىق قازاقستاننىڭ كرەاتيۆتى يندۋسترياسىنىڭ ءتۇرلى سالاسىندا جۇمىس ىستەيتىن ايەلدەردىڭ باستاماسىمەن قۇرىلدى. ولاردىڭ قىزمەتى ايەلدەر كوشباسشىلىعىن دامىتۋعا، تالانتتاردى قولداۋعا، كاسىبي داعدىلاردى جەتىلدىرۋگە، بەلسەندى جانە شىعارماشىلىق ايەلدەر جەلىسىن قالىپتاستىرۋعا باعىتتالعان.

ايتا كەتەيىك، الماتىدا ەسكەندىر حاسانعالييەۆتىڭ 85 جاسقا تولۋىنا وراي كورمە اشىلدى.