استانادا ۇلتتىق ۇلان ساربازدارى ءبىر تاۋلىكتە ءۇش ەسىرتكى تاراتۋشىنى ۇستادى

استانا. KAZINFORM - استانادا ق ر ءى ءى م ۇلتتىق ۇلانىنىڭ جاۋىنگەرلەرى قىزمەت بارىسىندا ەسىرتكى جاسىرۋشىلاردى قولعا ءتۇسىردى.

كۇدىكتىلەردىڭ ءبىرىنشىسى 18-قازاندا ساعات 19:50 شاماسىندا قولعا تۇسكەن. ەسىل اۋدانىندا قوعامدىق ءتارتىپتى قاداعالاۋ كەزىندە اسكەري جاساق اعاشتىڭ جانىندا بىردەڭە قاعىپ جاسىرىپ جاتقان ازاماتتى بايقايدى.

جاساق باستىعى سايىسكەلدى سايلاۋ ۇلى جانە قاتارداعى جاۋىنگەرلەر تەمىرلان اعانكەلدييەۆ پەن ەلامان ءابۇيىر دەرەۋ ونى ۇستاۋعا ارەكەت ەتتى.

- كۇدىكتىنىڭ اعاشتار اراسىنا بەلگىسىز زاتتارى بار بۋمالار جاسىرعانى انىقتالدى. ءبىز ونى ۇستاعان سوڭ، سول اۋماققا قوسىمشا تەكسەرۋ جۇرگىزدىك، - دەيدى اسكەري جاساق باستىعى.

ۇستالعان ەر ادام پوليتسيانىڭ ۋچاسكەلىك پۋنكتىنە جەتكىزىلدى. تەرگەۋ-جەدەل توبى كۋاگەرلەردىڭ كوزىنشە ونىڭ جەكە زاتتارىن ءتىنتۋ كەزىندە ىشىندە جاعىمسىز ءيىسى بار، سىرتى جابىسقاق تاسپامەن ورالعان 64 پاكەت تاركىلەندى.

ەكىنشى وقيعا ەسىل اۋدانى كوشەلەرىنىڭ بىرىندە ورىن الدى. اسكەري جاساق باستىعى ەركەبۇلان پارىمبەكوۆ جانە ءپاترۋلشى جاۋىنگەرلەر بەكنۇر اياشيەۆ پەن قۇربانالى ناۋرىزباي ماريحۋاناسى بار بايلام تاۋىپ، ءىز كەسۋ ناتيجەسىندە تاعى ەكى ەسىرتكى كۋرەرىن ۇستادى. وقيعا ورنىنا پوليتسيا قىزمەتكەرلەرى شاقىرىلدى.