استانادا كارديفف ۋنيۆەرسيتەتىنىڭ كامپۋسى اشىلادى

استانا. KAZINFORM - سوڭعى ەكى جىلدا شەتەلدەن 33 مىقتى زەرتتەۋشى ۋنيۆەرسيتەتتەر قازاقستانعا كەلۋگە كەلىستى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتىپ بەردى.

«ءبىزدىڭ قازىر باسىم باعىتىمىز - قازاقستاندى ۇلكەن اكادەميالىق جانە زەرتتەۋشى حابقا اينالدىرۋ. سوڭعى ەكى جىلدا شەتەلدەن 33 مىقتى زەرتتەۋشى ۋنيۆەرسيتەتتەر قازاقستانعا كەلۋگە كەلىستى. بۇل جۇمىس جالعاسۋدا. بۇگىن عانا لوندوننان كەلدىم، وندا كارديفف ۋنيۆەرسيتەتىمەن قول قويدىق. بۇل Russell Group اتتى ۇلىبريتانيانىڭ مىقتى ۋنيۆەرسيتەتتەر توبىنا كىرەتىن وقۋ ورنى. ەڭ الدىمەن Queen's University Belfast الماتىدا اشىلعان ەدى، ەندى استانادا Cardiff University ۇلكەن كامپۋس اشادى»، - دەدى عىلىم ءمينيسترى ەلوردادا «Digital Kazakhstan: زاماناۋي ءبىلىم بەرۋ» اتتى تامىز سامميتىندە.

كارديفف ۋنيۆەرسيتەتى ءۇشىن استانادان 14 گەكتار جەر بولىنگەن.

«كارديففكە قويىلعان ءبىرىنشى ماقسات - حالىقارالىق ستاندارتتاعا سايكەس پەداگوگتەردى دايىنداۋ. سوندىقتان نازاربايەۆ ۋنيۆەرسيتەتىنە، ءبىزدىڭ نەگىزگى ۇلتتىق پەداگوگيكالىق ۋنيۆەرسيتەتتەرگە بۇل ءارى كومەك، ءارى باسەكە بولادى. وسىلاي، شەت ءتىلىن مەڭگەرگەن مىقتى حالىقارالىق دەڭگەيدەگى پەداگوگتاردى وزىمىزدە دايارلايمىز»، - دەدى س. نۇربەك.

سونىمەن بىرگە، سالا ءمينيسترى ەلدەگى ءاربىر وڭىرلىك مەملەكەتتىك ۋنيۆەرسيتەتكە شەتەلدىك سەرىكتەس وقۋ ورىندارى بەكىتىلگەنىن ەسكە سالدى.

«شوتلانديانىڭ ەڭ كونە تەحنيكالىق ۋنيۆەرسيتەتى، مۇناي-گاز باعىتىندا ماماندانعان Heriot-Watt University اقتوبەدەگى جۇبانوۆ ۋنيۆەرسيتەتىنە ورنالاستى. ولار العاشقى جىلى 300 بالانى، بيىل 250 بالانى قابىلداپ، 550 ستۋدەنتكە ءبىلىم بەرۋدە. تاعى ءبىر ماقسات - وڭىرلىك ۋنيۆەرسيتەتتەرىمىزدى ترانسفورماتسيالاۋ. سەرىكتەستەرىمىزبەن ناقتى كەلىسىمشارتپەن بەكىتىلگەن، الداعى 4-5 جىلدا جەرگىلىكتى ۋنيۆەرسيتەتتەر شەتەلدىك ستاندارتتارعا ساي زەرتتەۋشى ۋنيۆەرسيتەتكە اينالۋى كەرەك جانە ءاربىر ۋنيۆەرسيتەت ءوڭىردىڭ دامۋ نۇكتەسى بولۋى كەرەك»، - دەدى ساياسات نۇربەك.

بۇعان دەيىن عىلىم جانە جوعارى ءبىلىم ءمينيسترى عىلىمي جۇمىستار مەن ديسسەرتاتسيا جازعاندا جاساندى ينتەللەكت قولدانۋ ەرەجەسىن تۇسىندىرگەن ەدى.