استانادا جىل سوڭىنا دەيىن تاعى 9 مەكتەپ اشىلادى
استانا. KAZINFORM - استانا اكىمى جەڭىس قاسىمبەك Instagram پاراقشاسىندا جىل سوڭىنا دەيىن قالادا تاعى 9 جاڭا مەكتەپ اشىلاتىنىن ءمالىم ەتتى، دەپ حابارلايدى ەلوردا اكىمدىگىنىڭ رەسمي سايتى.
«وسى جىلدىڭ سوڭىنا دەيىن تاعى 9 مەكتەپ اشۋدى جوسپارلاپ وتىرمىز. ولاردىڭ سەگىزى - مەملەكەت باسشىسىنىڭ «جايلى مەكتەپ» ۇلتتىق جوباسى اياسىندا سالىنعان مەكتەپتەر، تاعى بىرەۋى - جەكە مەكتەپ. اتالعان توعىز مەكتەپ ەكى اۋىسىمدا تاعى 30 مىڭنان استام وقۋشى ورنىن اشۋعا مۇمكىندىك بەرەدى.
ماسەلەن، ەسىل اۋدانىندا 4 مەكتەپ ورنالاسادى، نۇرا اۋدانىندا - 3 مەكتەپ، الماتى اۋدانىندا - 2 مەكتەپ. قالانى ارالاۋ بارىسىندا ءبىرقاتار وقۋ ورنىنىڭ قۇرىلىسىمەن تانىستىم. بۇل مەكتەپتەردىڭ ارقاسىندا 3 اۋىسىمدى 4 مەكتەپتىڭ جانە تىعىزدىعى جوعارى 3 مەكتەپتىڭ قيىندىعى شەشىلەدى.
وقۋ جىلىنىڭ باسىندا ءبىز 15 جاڭا مەكتەپ اشتىق. جاڭا مەكتەپتەردىڭ ارقاسىندا 3 اۋىسىمدا وقىتۋ جۇرگىزىلگەن 5 مەكتەپتىڭ جانە تىعىزدىلىعى جوعارى 4 مەكتەپتىڭ قيىندىعى شەشىلدى.
ءبىز سول سياقتى الداعى جىلدارعا دا دايىندالىپ وتىرمىز. 2025-جىلى تاعى 20 دان استام مەكتەپ سالىپ، پايدالانۋعا بەرۋدى جوسپارلاپ وتىرمىز»، - دەپ جازدى ەلوردا اكىمى.