استانادا جۇك كولىگىن تىزگىندەگەن 2500 دەن استام جۇرگىزۋشى جازالاندى
استانا. KAZINFORM - جىل باسىنان بەرى ەلوردادا 2500 دەن استام جۇك كولىگىنىڭ جۇرگىزۋشىسى اكىمشىلىك جاۋاپكەرشىلىككە تارتىلىپ، 1000 نان استام مەملەكەتتىك تىركەۋ ءنومىرى تاركىلەندى.
بۇل تۋرالى Polisia.kz جازدى.
استانادا جۇك كولىگىنىڭ جۇرگىزۋشىسى قۇجاتسىز جۇك تاسىمالداعانى ءۇشىن جاۋاپكەرشىلىككە تارتىلدى.
«كۇيگەنجار» بەكەتىندە پوليتسيا قىزمەتكەرلەرى الدىڭعى مەملەكەتتىك تىركەۋ ءنومىرى جوق «Shacman» جۇك كولىگىن تىركەمەسىمەن توقتاتتى. الايدا جۇرگىزۋشى پوليتسيا قىزمەتكەرلەرىنىڭ زاڭدى تالابىنا باعىنباي، قالاعا قاراي قوزعالىسىن جالعاستىردى. كەيىننەن كولىك باعدارشامدا توقتاتىلىپ، ۇستالدى. تەكسەرۋ بارىسىندا 30 جاستاعى جۇرگىزۋشىنىڭ تاسىمالداناتىن جۇككە رۇقسات قۇجاتتارىنىڭ جوق ەكەنى انىقتالدى.
پوليتسيا قىزمەتكەرلەرىنىڭ زاڭدى تالابىن ورىنداماۋ جانە مەملەكەتتىك تىركەۋ نومىرلىك بەلگىلەرىنسىز كولىك باسقارۋ دەرەكتەرى بويىنشا اكىمشىلىك حاتتامالار تولتىرىلدى. اتالعان قۇقىق بۇزۋشىلىقتار ءۇشىن جۇرگىزۋشى ءۇش تاۋلىككە ۋاقىتشا ۇستاۋ يزولياتورىنا قامالىپ، 10 ا ە ك مولشەرىندە ايىپپۇل سالىندى.
- استانا قالاسىنىڭ پوليتسيا دەپارتامەنتى جۇرگىزۋشىلەرگە جول قوزعالىسى ەرەجەلەرىن جانە قۇقىق قورعاۋ ورگاندارى قىزمەتكەرلەرىنىڭ تالاپتارىن قاتاڭ ساقتاۋدىڭ ماڭىزدىلىعىن ەسكە سالادى، - دەپ حابارلادى پوليتسيا دەپارتامەنتىنەن.