استانادا جەدەل جاردەم ستانتسياسىنىڭ ەكس-باسشىسى مۇرات ورازبايەۆ سوتتالدى

استانا. KAZINFORM - استانادا قالالىق جەدەل مەديتسينالىق جاردەم ستانتسياسىنىڭ بۇرىنعى باسشىسىنا قاتىستى ۇكىم شىقتى. مۇرات ورازبايەۆقا 36 ميلليون تەڭگەدەن استام سوماعا ايىپپۇل سالىندى.

ءىس بويىنشا ەكى ادامعا ايىپ تاعىلعان. ولار - پارا الدى دەپ ايىپ تاعىلعان مۇرات ورازبايەۆ جانە دەلدالدىق جاسادى دەگەن قالالىق جەدەل جاردەم ستانتسياسىنىڭ بۇرىنعى فەلدشەرى لاريسا مالينوۆسكايا.

ءىس ماتەريالدارىنا سايكەس 2022-جىلى ەكى مەديتسينالىق كوللەدج بەن جەدەل جاردەم ستانتسياسى اراسىندا بىرلەسكەن قىزمەت تۋرالى كەلىسىم جاسالعان. سول جىلدىڭ مامىر ايىندا ورازبايەۆ جەدەل جاردەم ستانتسياسىنداعى نەگىزگى جۇمىسىنان بولەك كوللەدجدە ۇستازدىق ەتىپ جۇرگەن مالينوۆسكايانى كابينەتىنە شاقىرعان.

ول مالينوۆسكايادان جالپى قورعانشىلىق ءۇشىن، ونىڭ ىشىندە مەديتسينالىق كوللەدجدەردە اقىلى نەگىزدە وقۋ تاجىريبەسىن وتكىزۋ مۇمكىندىگىن قامتاماسىز ەتۋگە جاردەمدەسۋ ماقساتىندا جوعارىدا اتالعان كوللەدجدەردەن وعان جالاقى رەتىندە ءتۇسىپ وتىراتىن قاراجاتتىڭ ءبىر بولىگىن - پارانى الىپ بەرىپ وتىرۋدى تالاپ ەتكەن. مالينوۆسكايا جۇمىسىنان ايىرىلىپ قالۋدان قورقىپ، ورازبايەۆتىڭ تالاپتارىنا كەلىسكەنى ايتىلدى.

ءىس ماتەريالدارىنا سايكەس ورازبايەۆ 2022-جىلدىڭ 12-مامىرىنان باستاپ 2023-جىلدىڭ تامىزىنا دەيىن جالپى قورعانشىلىق، ونىڭ ىشىندە مەديتسينالىق كوللەدجدەردە اقىلى نەگىزدە وقۋ تاجىريبەسىن وتكىزۋگە جاردەمدەسكەنى ءۇشىن مالينوۆسكايادان ءوزىنىڭ جەكە شوتىنا اۋدارىم جاساۋ ارقىلى مالينوۆسكاياعا مەديتسينا كوللەدجدەرىنەن جالاقى رەتىندە ءتۇسىپ وتىرعان اقشا تۇرىندە پارا العان. جالپى سوما 676 مىڭ تەڭگە بولعان.

ودان بولەك، 2022-جىلدىڭ قاڭتارىنان 2023-جىلدىڭ ساۋىرىنە دەيىن باس فەلدشەر مالينوۆسكايا مەنتور-تالىمگەر بولا وتىرىپ، «ر.» ج ش س- نا سانى از ستۋدەنت توبىنا مەنتور-تالىمگەر ۇستاۋ ءتيىمسىز ەكەنىن ءتۇسىنىپ، ولاردىڭ ستۋدەنتتەرىن باسقا كوللەدجدەردىڭ ستۋدەنتتەرىمەن بىرىكتىرۋگە كەلىسىپ، بىرگە وقىتقان. 2023-جىلى ءساۋىردىڭ سوڭىندا «ر.» ج ش س- مەن جاسالعان كەلىسىمشارتتىڭ ەگجەي-تەگجەيىن بىلگەن ورازبايەۆ مالينوۆسكايانى كلينيكالىق بازانى بەرۋدى كوزدەيتىن شارتتارى بار جاڭا كەلىسىم جاساسۋ ءۇشىن كابينەتىنە شاقىردى.

مالينوۆسكايا ورازبايەۆقا باسقا شارتتارمەن جاڭا كەلىسىم جاساسۋدىڭ مۇمكىن ەمەستىگى تۋرالى ايتقان. مالينوۆسكايانى تىڭداي كەلە ورازبايەۆ «ر.» ج ش س وكىلدەرىنەن اقشا تۇرىندەگى پارا الۋ ماقساتىندا پراكتيكالىق تاجىريبەدەن ءوتىپ جاتقان ستۋدەنتتەر سانىنىڭ كوبەيگەنىن ءبىلىپ، مەكەمەنىڭ كلينيكالىق بازاسىندا اكادەميا ستۋدەنتتەرىنىڭ تاعىلىمدامادان وتۋىنە مۇمكىندىك بەرگەنى ءۇشىن ودان 100 مىڭ تەڭگە كولەمىندە پارانى بەرىپ جىبەرۋدىڭ قاجەت ەكەنىن ايتقان. مالينوۆسكايا پارا الۋ بويىنشا دەلدالدىق جاساۋعا كەلىسكەن. 2023-جىلى 25-ساۋىردە مالينوۆسكايا پارانى ورازبايەۆقا اۋدارعان.

سوت ۇكىمىمەن ورازبايەۆ مۇرات بەكايدار ۇلى قىلمىستىق كودەكستىڭ 366-بابىنىڭ 3-بولىگىنىڭ 4-تارماعىندا كوزدەلگەن قىلمىستىق قۇقىق بۇزۋشىلىقتى جاساعانى ءۇشىن كىنالى دەپ تانىلىپ، وعان وسى باپ بويىنشا 46,6 ەسەلەنگەن سوما كولەمىندە، ياعني، 36 ميلليون تەڭگەدەن استام سومادا ايىپپۇل جانە ءومىر بويىنا مەملەكەتتىك قىزمەتتە لاۋازىمداردى اتقارۋ قۇقىعىنان ايىرۋ جازاسى تاعايىندالدى.

سونىمەن قاتار، سوت ونى سوت زالىندا بوساتىپ، ەشقايدا كەتپەۋ تۋرالى قولحاتپەن جىبەرۋ تۋرالى شەشىم شىعاردى. مالينوۆسكايا لاريسا نيكولايەۆنا قىلمىستىق كودەكستىڭ 368-بابىنىڭ 2-بولىگىندە كوزدەلگەن قىلمىستىق قۇقىقبۇزۋشىلىقتى جاساعانى ءۇشىن كىنالى دەپ تانىلىپ، وعان وسى باپ بويىنشا پارانىڭ 20 ەسەلەنگەن سوماسى مولشەرىندە، ياعني 2 ميلليون تەڭگە ايىپپۇل تۇرىندە جازا تاعايىندالدى. سوتتالعاندارعا سوت شەشىمى زاڭدى كۇشىنە ەنگەن كۇننەن باستاپ 10 كۇن ىشىندە ايىپپۇل تولەۋگە ۇكىم شىعارىلدى.

سونداي-اق ولار زارداپ شەككەندەرگە وتەماقى تولەۋگە جانە سوت شىعىندارىن تولەۋگە مىندەتتەلدى. ەسكە سالا كەتسەك، 2023-جىلى جەلتوقساندا جەدەل جاردەم قىزمەتى ديرەكتورىن سىبايلاس جەمقورلىققا قارسى ءىس-قيمىل اگەنتتىگىنىڭ استانالىق دەپارتامەنتى قىزمەتكەرلەرى ۇستاعانى بەلگىلى بولدى. كەلەسى كۇنى استانادا جەدەل جاردەم ستانتسياسىنىڭ ديرەكتورى قاماۋعا الىندى دەگەن اقپارات پايدا بولدى.

KAZ.NUR.KZ