استانادا جاڭا جىل تۇنىندە قانداي ءىس-شارالار وتەدى

جاڭا جىل تۇنىندە 31- جەلتوقساننان 1- قاڭتارعا دەيىن قالانىڭ ءۇش جەرىندە مەرەكەلىك ءىس-شارالار وتەدى، دەپ حابارلايدى Kazinform ەلوردا اكىمدىگىنىڭ رەسمي سايتىنا سىلتەمە جاساپ.

31- جەلتوقسان كۇنى ساعات 21:00 دەن 02:00 گە دەيىن ەلوردانىڭ قالالىق الاڭىندا، «قازاق ەلى» مونۋمەنتى مەن ەكسپو الاڭىندا قازاقستاندىق ەسترادا جۇلدىزدارىنىڭ قاتىسۋىمەن قالا تۇرعىندارى مەن قوناقتارى ءۇشىن «جاڭا جىل ءتۇنى» اتتى جاڭا جىلدىق مەرەكەلىك كونسەرتتەر وتەدى.

ءىس-شاراعا وتاندىق ەسترادا جۇلدىزدارى Qanay، ءالي وقاپوۆ، Ayree، مارجان اراپبايەۆا، يلحان يحسان، كەنجەبەك ءجانابىلوۆ، ديانا يسمايل، اۋكا، ەركەش حاسەن، سەرىك يبراگيموۆ، الىشەر كارىموۆ، «كيليماندجارو» توبى، الماس كىشكەنبايەۆ، بەيبىت قورعان جانە باسقا دا ارتىستەر قاتىسادى.

ساعات 23:45 تە ەكسپو الاڭىنان «Jibek Joly» تەلەارناسى تىكەلەي ەفيرگە شىعادى. تىكەلەي ەفيردە پرەزيدەنت قاسىم-جومارت توقايەۆتىڭ جاڭا جىلدىق قۇتتىقتاۋى كورسەتىلەدى جانە مەرەكەلىك باعدارلاما بولادى.

سونىمەن قاتار 31- جەلتوقساندا استانادا جۇگىرۋدەن جاپپاي جارىس وتەدى. قاتىسۋشىلار 2024 مەتر قاشىقتىقتى ەڭسەرۋدى جوسپارلاپ وتىر. باستالۋى ساعات 21.00 دە. جارىسقا قاتىسۋعا ستارت پاكەتتەرى 31- جەلتوقسان ساعات 20.30 دان باستاپ بەرىلەدى.