استانادا ج و و قىزمەتكەرى گرانتقا ءتۇسىرىپ بەرەمىن دەگەن جەلەۋمەن 3 ميلليون تەڭگە يەمدەنگەن
استانا. KAZINFORM - استانادا ستۋدەنتتەر مەن ولاردىڭ اتا-انالارىن الداپ، گرانتقا اۋىستىرۋ جونىندە ۋادە بەرىپ، اقشالارىن يەمدەنگەن بۇرىنعى ج و و قىزمەتكەرى سوتتالدى. بۇل تۋرالى باس پروكۋراتۋرا ءمالىم ەتتى.
- تۇلەكتەردى جۇمىسپەن قامتۋعا جاردەمدەسۋ سەكتورىندا جۇمىس ىستەي وتىرىپ، ول ستۋدەنتتەر مەن ولاردىڭ اتا-انالارىن اكادەميالىق ۇلگەرىم، گرانتقا اۋىستىرۋ جانە ستيپەنديانى قايتارۋ ماسەلەلەرىن «شەشىپ» بەرە الاتىنىنا سەندىرگەن. 2023-2024 -جىلدار ارالىعىندا ول الاياقتىق جولمەن 3 ميلليون تەڭگەدەن استام قارجىنى يەمدەنگەنى انىقتالدى. ونىڭ ارەكەتىنەن 15 ادام زارداپ شەككەن، - دەلىنگەن پروكۋراتۋرا حابارلاماسىندا.
مەملەكەتتىك ايىپتاۋشى ونىڭ كىناسىن تولىق دالەلدەدى.
جابىرلەنۋشىلەرگە كەلتىرىلگەن شىعىن وتەلدى.
كىناسىن مويىنداپ، زالالدى وتەۋى جانە كامەلەتكە تولماعان بالالارىنىڭ بولۋى ەسكەرىلىپ، ول 3 جىلعا باس بوستاندىعىن شەكتەۋ جازاسىنا سوتتالىپ، تاعايىندالعان مەرزىمگە پروباتسيالىق باقىلاۋ بەلگىلەندى.
ۇكىم زاڭدى كۇشىنە ەندى.
ەسكە سالا كەتەيىك، بۇعان دەيىن ادام ساۋداسىنا قاتىستى 40 قىلمىس انىقتالعانىن جازعان بولاتىنبىز.