استانادا حالىقارالىق روبوتوتەحنيكا چەمپيوناتىنا 134 كوماندا قاتىسىپ جاتىر
استانا. قازاقپارات - 2025 -جىلعى 13-مامىردا استانا قالاسىندا «Robotek Grand Tournament» حالىقارالىق روبوتوتەحنيكا چەمپيوناتى باستالدى.
بۇل دودا قازاقستان مەن الەمدەگى ەڭ ءىرى جاسوسپىرىمدەرگە ارنالعان روبوتوتەحنيكا جارىستارىنىڭ ءبىرى رەتىندە تانىلىپ وتىر.
ءتورت جىل ىشىندە «Robotek Grand Tournament» ۇلتتىق IT برەندكە اينالىپ، ونىڭ بارلىق رەگلامەنتى وتاندىق زياتكەرلىك مەنشىككە نەگىزدەلگەن.
چەمپيوناتقا ەلىمىزدىڭ 17 وڭىرىندەگى ىرىكتەۋ تۋرنيرلەرىنىڭ جەڭىمپازدارى جينالدى. بيىلعى جارىسقا العاش رەت ا ق ش دەلەگاتسياسى قاتىسىپ وتىر. سونىمەن قاتار بولگاريا، ازەربايجان، مولدوۆا، وزبەكستان، قىرعىزستان، تاجىكستان سەكىلدى ەلدەردەن 25 تەن استام شەتەلدىك دەلەگاتسيا كەلگەن.
جالپى العاندا، جارىسقا 134 كوماندا قۇرامىندا 9 بەن 17 جاس ارالىعىنداعى 350 دەن استام مەكتەپ وقۋشىسى (ونىڭ ىشىندە 40 قا جۋىق شەتەلدىك قاتىسۋشى) قاتىسىپ، 270 تەن استام روبوت جەتى ءتۇرلى سانات بويىنشا باق سىناپ جاتىر.
چەمپيونات اياسىندا ءار سانات بويىنشا جەڭىمپازدار مەن جۇلدەگەرلەرگە كۋبوكتار مەن قۇرمەت گراموتالارى تابىستالادى. سونىمەن قاتار «ۇزدىك اۋىلدىق كوماندا»، «ۇزدىك شەتەلدىك كوماندا»، «ۇزدىك ينجەنەرلىك شەشىم» سەكىلدى ارنايى نوميناتسيالار بويىنشا دا ماراپاتتار قاراستىرىلعان.
جارىس قورىتىندىسى بويىنشا ەكى جەڭىمپازعا قازاقستان- بريتان تەحنيكالىق ۋنيۆەرسيتەتىنىڭ اقپاراتتىق تەحنولوگيالار جانە ينجەنەريا مەكتەبىنە ءبىلىم گرانتى، سونداي-اق الماتى ەنەرگەتيكا بايلانىس ۋنيۆەرسيتەتىنىڭ گرانتى ۇسىنىلادى.
چەمپيوناتتى استانا قالاسىنىڭ اكىمدىگى مەن «دارىن» رەسپۋبليكالىق عىلىمي- پراكتيكالىق ورتالىعىمەن بىرلەسىپ ۇيىمداستىرىپ وتىرعان - ەلىمىزدەگى STEM- ءبىلىم مەن روبوتوتەحنيكا سالاسىنداعى ەڭ تابىستى كومپانيالاردىڭ ءبىرى سانالاتىن «Robotek» كومپانياسى.
ايتا كەتەيىك، 2023 -جىلعى قاراشادا پانامادا وتكەن World Robot Olympiad حالىقارالىق جارىسىندا «Robotek» كومپانياسىنىڭ ەكى بىردەي كومانداسى جەڭىس تۇعىرىنان كورىنىپ، ەل ابىرويىن اسقاقتاتتى.
بۇعان دەيىن قازاقستاندىق وقۋشىلار الەمدەگى ەڭ ءىرى روبوتوتەحنيكا چەمپيوناتىندا ەل نامىسىن قورعايتىنى حابارلاندى.
اۆتور
مۇقتار مۇرات