استانادا حالىقارالىق گۇلدەر كورمەسى ءوتىپ جاتىر
استانا. KAZINFORM - استاناداعى ەكسپو حالىقارالىق كورمە ورتالىعىندا Flora Expo Astana 2025 اتتى حالىقارالىق گۇلدەر كورمەسى ءوتىپ جاتىر.
وسىمەن 12 جىل قاتارىنان وتكىزىلىپ جاتقان ءىس-شاراعا بيىل نيدەرلاند، فرانسيا، شۆەيتساريا، كنيا، وڭتۇستىك كورەيا، جاپونيا، بەلگيا، يتاليا، وزبەكستان، پولشا، ەكۆادور سياقتى 20 ەلدەن 200 دەن استام كومپانيا قاتىسىپ وتىر.
ۇيىمداستىرۋشىلاردىڭ ايتۋىنشا، بىلتىرعى كورمە جىلىجاي تاقىرىبىنا ارنالىپ، شارا قوناقتارىنىڭ قىزىعۋشىلىعىن تۋعىزعان كورىنەدى. سونى ەسكەرىپ بيىل دا وسى تاقىرىپتى تەرەڭدەتۋ تۋرالى شەشىم قابىلداپتى. جىلىجايدى اۆتوماتتاندىرۋ، كليماتتى باسقارۋ، جىلىجاي ىشىندەگى جارىق پەن ىلعالدى سيفرلىق تاسىلدەرمەن رەتتەۋ ماسەلەلەرىنە ارنالعان تىڭ شەشىمدەر كورمەگە قويىلىپ وتىر.
ايتا كەتۋ كەرەك، كورمەگە ءوز ءونىمىن ۇسىنعان 200 دەن استام كومپانيانىڭ 40 تان استامى «قىزعالداقتار ەلىنەن» كەلگەن.
8-10-ءساۋىر ارالىعىندا وتەتىن كورمەدە نيدەرلاند كومپانيالارىنىڭ گۇل يندۋسترياسىنداعى يننوۆاتسيالىق تەحنولوگيالارى، كوگالداندىرۋ ماسەلەلەرى، قىزعالداق ءوسىرۋ سەمينارى، جىلىجاي بيزنەسى وكىلدەرىنىڭ فورۋمى، قازاقستان فلوريستيكاسىنىڭ الەۋەتى تاقىرىپتارىنا ارنالعان 25 ءىس-شارا ۇيىمداستىرىلادى.
كورمە اياسىندا الەمنىڭ گۇل ەكسپورتى نارىعىندا جەتەكشى سانالاتىن كومپانيالار شەبەرلىك ساعاتتارىن وتكىزەدى. كورمە 8,9-ءساۋىر كۇندەرى 9.00-18.00 ارالىعىندا، 10-ءساۋىر كۇنى 9.30-15.30 ارالىعىندا وتەدى.
بىلتىر قازاقستان 93,5 ميلليون دوللارعا 12,3 مىڭ توننا گۇل يمپورتتاعان.