استانادا حالىقارالىق فرانسۋز مەكتەبى اشىلادى

استانا. قازاقپارات- پاريجدە قاسىم-جومارت توقايەۆتىڭ فرانسياعا مەملەكەتتىك ساپارىنىڭ اياسىندا استانادا حالىقارالىق مەكتەپ اشۋ تۋرالى كەلىسىمشارتقا قول قويىلدى، دەپ حابارلايدى 24KZ.

جاڭا وقۋ ورنىنىڭ قۇرىلىسىنا قارجىنى Freedom Holding Corp بەرەدى. ال وسى حولدينگتىڭ كورپوراتيۆتىك قورى ارقىلى مەكتەپ تۇلەكتەرى فرانسيانىڭ جوعارى وقۋ ورىندارىنا تۇسە الادى. ءتيىستى كەلىسىمگە Freedom Holding Corp باس اتقارۋشى ديرەكتورى تيمۋر تۋرلوۆ جانە «شەتەلدەگى فرانسۋز ءبىلىمى» اگەنتتىگى ديرەكتورىنىڭ ورىنباسارى جان-پول نيگرەل قول قويعان. مەتسەنات ءبىلىم ورداسىن قازىر الەم بويىنشا 600-دەن استام وقۋ ورنىنا يەلىك ەتەتىن فرانسۋز اگەنتتىگىمەن بىرلەسىپ باسقارماق.

قازاقستان مەن فرانسيا پرەزيدەنتتەرى الدىڭعى ساپارلارىنىڭ ناتيجەسى بويىنشا استانا مەن الماتىدا ەكى فرانسۋز مەكتەبىن اشۋ تۋرالى يدەيانى قولداپ، ءبىلىم سالاسىنداعى ىنتىماقتاستىققا باسىمدىق بەرگەن بولاتىن.

جان-پول نيگرەل، «شەتەلدەگى فرانسۋز ءبىلىمى» اگەنتتىگى ديرەكتورىنىڭ ورىنباسارى:

- ەلدەرىمىزدىڭ، حالىقتارىمىزدىڭ اراسىنداعى دوستىق اياسىندا قازاقستان فرانسۋز ءبىلىمىن شەتەلدە دامىتۋعا ايرىقشا ۇلەس قوسىپ وتىر. ەكىجاقتى ماڭىزدى ىستەرگە ءبىز دە ءوز تاراپىمىزدان قولداۋ كورسەتەمىز.

تيمۋر تۋرلوۆ، Freedom Holding Corp باس اتقارۋشى ديرەكتورى:

- مەكتەپتى جوبالاۋ جانە سالۋ جۇمىسىنا قىزۋ دايىندىق جاساپ جاتىرمىز. وقۋ ورنىن جاقىن جىلدارى اشامىز. قازاقستاندىق وقۋشىلار ساپالى ەۋروپالىق ءبىلىم الادى دەپ ۇمىتتەنەمىن. ادام كاپيتالى - قازىر ءبىزدىڭ ەلىمىز ءۇشىن ەڭ باستى جانە ەڭ ماڭىزدى قۇندىلىق.

رومان ۆاسيلەنكو، ق ر سىرتقى ىستەر ءمينيسترىنىڭ ورىنباسارى:

- ارينە، بۇل قازاقستاندىق ستاندارتتاردى ەسكەرە وتىرىپ، فرانسۋز تىلىندە ساپالى ءبىلىم الۋعا نەگىز بولادى. قازاقستان جاستارى ءارى قاراي فرانسيادا وقىپ، العان بىلىمىمەن قازاقستاندا جۇمىس ىستەيدى. قازىر ەلىمىزدە فرانسيامەن بىرلەسكەن 200 كومپانيا بار.

24.kz