استانادا حالىقارالىق بەينەماتەريالدار بايقاۋى مارەسىنە جەتتى

استانا. KAZINFORM - استانادا «بىرىككەن ۇلت جەڭەدى» اتتى V حالىقارالىق بەينەماتەريالدار بايقاۋىنىڭ جەڭىمپازدارى ماراپاتتالدى.

«ۇلى جەڭىستى ۇلىقتاعان، رۋحى بيىك جاس ۇرپاق!» تاقىرىبىمەن جاريالانعان شىعارماشىلىق دوداعا قازاقستان وقۋ ورىندارىنان باسقا ا ق ش، ۇلى بريتانيا، جاپونيا، وڭتۇستىك كورەيا، تۇركيا، رەسەي جانە ورتالىق ازيا ەلدەرىنىڭ 100 دەن استام ۋنيۆەرسيتەتىنەن بەينەماتەريالدار كەلىپ تۇسكەن. ءبىلىم الۋشى جاستاردىڭ جۇمىستارى تەك تاريحي تاقىرىپپەن شەكتەلىپ قويماي، ۇلتتىڭ جادى، بەيبىتشىلىك پەن بولاشاق ۇرپاقتىڭ رۋحاني دامۋى جونىندەگى زاماناۋي كوزقاراستارمەن ەرەكشەلەندى.

بايقاۋدىڭ نەگىزىن قالاۋشى - پروفەسسور، كاسىبي تەلەجۋرناليست، «دارىن» مەملەكەتتىك سىيلىعىنىڭ يەگەرى ۇلبوسىن ەسەنبەكوۆا. 2020 -جىلى پاندەميا كەزىندە پروفەسسور ءوزىنىڭ وسى جوباسىن ۇسىنعان ساتتەن باستاپ، بايقاۋ جىل سايىن وزەكتىلىگىن ارتتىرىپ، جاستار ءۇشىن شىعارماشىلىق ەركىندىك پەن پاتريوتتىق رۋحتى توعىستىرعان ماڭىزدى پلاتفورماعا اينالعان.

- جاساندى ينتەللەكت پەن الاپات سيفرلىق داۋىلدار داۋىرىندە قازاق مەدياسىن الەمگە تانىتۋ - باستى ميسسيامىز بولدى. بۇل بايقاۋ - ويى جۇيرىك، ءسوزى وتكىر، جاڭا زامان جۋرناليستەرىن تاربيەلەۋ الاڭى، - دەدى ۇلبوسىن ەسەنبەكوۆا.

بايقاۋعا قاتىسۋشىلارعا پارلامەنت ءماجىلىسىنىڭ دەپۋتاتتارى، اقىن قازىبەك يسا مەن جاناربەك ءاشىمجان جۇرەكجاردى لەبىزدەرىن ارنادى.

قازىبەك يسا بۇل جوبانى «ۇلتتىق يدەولوگيانى جاڭعىرتاتىن ماڭىزدى باستاما» دەپ باعالاسا، جاناربەك ءاشىمجان «بايقاۋ اتاۋى - پوەتيكالىق تىركەس قانا ەمەس، ۇلت بولاشاعىنا سەنىم ۇيالاتاتىن ۇران» ەكەنىن اتاپ ءوتتى.

بايقاۋدىڭ ەڭ جوعارعى ماراپاتى - گران-پري ل. ن. گۋميلەۆ اتىنداعى ە ۇ ۋ ستۋدەنتى فاريزا باۋىرجان قىزىنا تابىستالدى.