استانادا حالىقارالىق ارالدى قۇتقارۋ قورى باسقارماسىنىڭ ءبىرىنشى وتىرىسى ءوتتى
استانا. KAZINFORM - پرەمەر-ءمينيستردىڭ ورىنباسارى قانات بوزىمبايەۆتىڭ توراعالىعىمەن وتكەن ءىس-شاراعا قازاقستاننىڭ سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ، ح ا ق ق اتقارۋ كوميتەتىنىڭ ءتوراعاسى اسحات ورالباي، تاجىكستان پرەمەر-ءمينيسترىنىڭ ورىنباسارى سۋلايمون زيەزودا، تۇرىكمەنستان مينيسترلەر كابينەتى ءتوراعاسىنىڭ ورىنباسارى تانگرىكۋلي اتاحاللىيەۆ، وزبەكستان رەسپۋبليكاسى پرەزيدەنتىنىڭ كەڭەسشىسى شۋحرات گانيەۆ، قىرعىزستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى داستان ديۋشەكەيەۆ قاتىستى.
حالىقارالىق ارالدى قۇتقارۋ قورى (ح ا ق ق) - 1993-جىلى قۇرىلعان جانە ورتالىق ازياداعى نەگىزگى ايماقتىق ورگانداردىڭ ءبىرى. قازاقستان 2026-جىلعا دەيىن ح ا ق ق ءتوراعالىعىن قابىلدادى جانە بۇگىن قور باسقارماسىنىڭ ءبىرىنشى وتىرىسىن وتكىزدى.
«ح ا ق ق ورتالىق ازيانىڭ الەۋمەتتىك-ەكونوميكالىق ءال-اۋقاتىنا ىقپال ەتە الاتىن وڭىرلىك ىنتىماقتاستىقتىڭ قۋاتتى ۇجىمدىق قۇرالىنا اينالدى. حاقق شەڭبەرىندەگى تىعىز ءوزارا ءىس-قيمىلدىڭ جانە مەملەكەتتەر باسشىلارىنىڭ ساياسي ەرىك-جىگەرىنىڭ ارقاسىندا قور ارال داعدارىسىنا بايلانىستى كەڭ اۋقىمدى ماسەلەلەردى شەشۋگە ءبىزدىڭ ەلدەرىمىز كۇش-جىگەرىن بىرىكتىرە الدى. باسقارمانىڭ قازىرگى وتىرىسى ەلدەرىمىزدىڭ كۇش-جىگەرىنە قوسىمشا سەرپىن بەرەتىنىنە سەنىمدىمىن. ارال تەڭىزى باسسەينىندەگى سۋ-ەنەرگەتيكالىق رەسۋرستاردى ءوزارا ءتيىمدى پايدالانۋدىڭ ۇزاق مەرزىمدى تەتىگى قاجەت. سونداي-اق سىرداريا جانە امۋداريا وزەندەرى باسسەيندەرىندەگى ەنەرگەتيكالىق جانە يرريگاتسيالىق مۇددەلەردى ەسكەرە وتىرىپ، سۋ قويمالارىنىڭ جۇمىس رەجيمدەرى بويىنشا كەلىسىلگەن ءىس-قيمىلداردى قامتاماسىز ەتۋ قاجەت. سۋ مەن ەنەرگەتيكا قىزمەتكەرلەرىنىڭ تىكەلەي ءوزارا ارەكەتتەسۋى كليماتتىق جاعدايلاردا، ياعني، سۋ تاسقىنى مەن قۇرعاقشىلىق كەزىندە كەلىسىلگەن شەشىمدەر قابىلداۋعا مۇمكىندىك بەرەدى»، - دەپ اتاپ ءوتتى ۆيتسە-پرەمەر قانات بوزىمبايەۆ ءوز سوزىندە.
جيىن بارىسىندا قازاقستان تاراپى جۇمىس جوسپارىن ۇسىندى. قۇجات قۇرىلتايشى مەملەكەتتەردىڭ باسشىلارى مەن حاقق پرەزيدەنتىنىڭ تاپسىرمالارىن ىسكە اسىرۋعا، قوردىڭ ۇيىمدىق قۇرىلىمى مەن شارتتىق-قۇقىقتىق بازاسىن جەتىلدىرۋگە ارنالعان 10 باعىت پەن 40 تان استام ءىس-شارادان تۇرادى.
ەكى اۋقىمدى جوبانى: اياسىندا وڭىردە 35 جوبا ىسكە اسىرىلىپ جاتقان ارال تەڭىزى باسسەينى ەلدەرىنە كومەك كورسەتۋ جونىندەگى ءىس- قيمىل باعدارلاماسى جانە ورتالىق ازيادا ورنىقتى دامۋ ءۇشىن قورشاعان ورتانى قورعاۋ جونىندەگى وڭىرلىك باعدارلامانى ودان ءارى جۇزەگە اسىرۋ دا باسىم باعىت سانالادى.