استانادا شي جينپيڭنىڭ قازاق تىلىندەگى كىتابى تانىستىرىلدى

استانا. KAZINFORM - استاناداعى نازاربايەۆ ۋنيۆەرسيتەتىندە قىتاي حالىق رەسپۋبليكاسىنىڭ ءتوراعاسى شي جينپيڭنىڭ «ەل باسقارۋ جونىندە» اتتى ءتورت تومدىق كىتابىنىڭ تۇساۋكەسەرى ءوتتى، دەپ حابارلايدى مادەنيەت جانە اقپارات مينيسترلىگى.

ءىس-شاراعا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆا، قىتاي كوممۋنيستىك پارتياسى ورتالىق كوميتەتىنىڭ ۇگىت-ناسيحات ءبولىمى مەڭگەرۋشىسىنىڭ ورىنباسارى حۋ حەپين، ق ح ر ۇلت ىستەرى جونىندەگى كوميتەت ءتوراعاسىنىڭ ورىنباسارى گو ۆەيپين، ق ح ر شەتەل ادەبيەتىن باسىپ شىعارۋ جانە تاراتۋ جونىندەگى باس باسقارماسىنىڭ جەتەكشىسى دۋ چجانيۋان، سونداي-اق قازاقستان رەسپۋبليكاسىنداعى ق ح ر- دىڭ توتەنشە جانە وكىلەتتى ەلشىسى حان چۋنلين قاتىستى.

جيىن بارىسىندا ايدا بالايەۆا ەكى ەل اراسىنداعى مادەني ىنتىماقتاستىقتىڭ ماڭىزىن اتاپ ءوتتى.

- قىتاي - قازاقستان ءۇشىن سەنىمدى دوس، وداقتاس ءارى ستراتەگيالىق سەرىكتەس. ەكى ەل اراسىنداعى عاسىرلار بويعى دوستىق، ءوزارا قۇرمەت پەن سەنىمگە نەگىزدەلگەن ىنتىماقتاستىق بۇگىندە بارلىق باعىتتا تابىستى دامىپ كەلەدى. مەملەكەتتەرىمىزدىڭ باسشىلارى اراسىنداعى ءوزارا تۇسىنىستىك پەن جوعارى دەڭگەيدەگى سەنىم - ەكىجاقتى قارىم-قاتىناستاردىڭ نىعايۋىنا زور ىقپال ەتۋدە. بۇل كىتاپ - قىتاي مەملەكەتىنىڭ ساياسي باعىت-باعدارىن، ۇلتتىق بىرلىك پەن تۇراقتىلىقتى قامتاماسىز ەتۋدەگى ۇستانىمدارىن، سونداي-اق ۇزاقمەرزىمدى ستراتەگيالىق ماقساتتارىن تۇسىنۋگە ۇمتىلاتىن قازاقستاندىق وقىرمان ءۇشىن قۇندى دەرەككوز بولماق. سونىمەن قاتار، تۋىندى - قىتايدىڭ حالىقارالىق ارەناداعى ۇستانىمدارى مەن ءرولىن سارالاۋعا مۇمكىندىك بەرەتىن ماڭىزدى ەڭبەك، - دەدى ايدا بالايەۆا.

كىتاپ قىتاي حالىق رەسپۋبليكاسىنداعى مەملەكەتتىك باسقارۋ فيلوسوفياسى مەن تاجىريبەسىنە ارنالعان. وندا ق ح ر باسشىسىنىڭ ىشكى جانە سىرتقى ساياسات، ەكونوميكالىق جانە الەۋمەتتىك دامۋ ستراتەگيالارى جونىندەگى كوزقاراستارى قامتىلعان. باسىلىم ساياساتتانۋشىلارعا، حالىقارالىق قاتىناستار سالاسىنىڭ ماماندارىنا، ازيا ەلدەرىنىڭ دامۋ جولىنا قىزىعاتىن ماماندارعا، سونداي-اق قىتاي ءتىلى، مادەنيەتى مەن قوعامدىق قۇرىلىمىن زەرتتەيتىن عالىمدارعا ارنالعان.

وسىعان دەيىن «دايديداۋ» ءانىنىڭ تاريحىنا ارنالعان كىتاپ ءتورت تىلدە جارىق كورگەنىن جازدىق.