استانادا دۇنيەجۇزىلىك كوشپەندىلەر ويىندارىنىڭ سالتاناتتى اشىلۋى باستالدى
استانا. KAZINFORM - «استانا ارەنا» ستاديونىندا V دۇنيەجۇزىلىك كوشپەندىلەر ويىندارىنىڭ سالتاناتتى اشىلۋ ءراسىمى ءوتىپ جاتىر. الدىمەن ۇلكەن ەكراندا «قوش كەلدىڭىزدەر!» دەگەن ءسوز شىقتى. سونىمەن قاتار مەملەكەتتىك تۋ شىعارىلىپ، ءان ۇران ورىندالدى.
ايتۋلى شارانىڭ مارتەبەلى قوناقتارى قاتارىندا ق ر پرەزيدەنتى قاسىم- جومارت توقايەۆ، وزبەكستان رەسپۋبليكاسىنىڭ پرەزيدەنتى شاۆكات ميرزيايەۆ، قىرعىزستان رەسپۋبليكاسىنىڭ پرەزيدەنتى سادىر جاپاروۆ، تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆ، تاتارستان رايسى رۋستام ميننيحانوۆ، ساحا رەسپۋبليكاسىنىڭ باسشىسى ايسەن نيكولايەۆ، موڭعوليانىڭ III پرەزيدەنتى نامبارىن ەنحبايار بار.
دۇنيەجۇزىلىك كوشپەندىلەر ويىندارىنىڭ اشىلۋ سالتاناتىنا 20 مىڭ كورەرمەن جينالعان.
الداعى ەكى ساعات بويى 3 مىڭ ونەرپاز ونەر كورسەتەدى. قاتىسۋشىلار اراسىندا ەلىمىزدىڭ ءتۇرلى وڭىرىنەن مادەنيەت سالاسىنىڭ وكىلدەرى، مادەنيەت جانە اقپارات مينيسترلىگىنە قاراستى مەكەمەلەردىڭ ارتىستەرى بار.
ەلىمىزدە دۇنيەجۇزىلىك كوشپەندىلەر ويىندارىنا دايىندالۋ جانە وتكىزۋ ماقساتىندا ق ر پرەمەر- ءمينيسترى ورىنباسارىنىڭ توراعالىعىمەن ارنايى كوميتەت قۇرىلدى. بۇگىن باستالعان دۇنيەجۇزىلىك كوشپەندىلەر ويىندارى «استانا ارەنا» ستاديونى، «قازانات» يپودرومى، ج. ۇشكەمپىروۆ اتىنداعى جەكپە- جەك سارايى، «الاۋ» مۇز سارايى، «Qazaqstan» جەڭىل اتلەتيكا سپورت كەشەنى، «دۋمان» كەشەنى سياقتى 6 نىساندا وتەدى.
اشىلۋ سالتاناتىن «قازاقستان» ، «قازسپورت» ، «حابار» ، «ەل ارنا» ، «Jibek Joly» ، »Silk Way« ، «Sport Plus» ارنالارىمەن قاتار، تۇركيانىڭ TRT AVAZ ارناسى، قىرعىزستاننىڭ 5 تەلەارناسى، حالىقارالىق «مير» ، «مير 24» ارنالارى، رەسەيدىڭ «ستارت LIVE» سپورت ارناسى، تاتارستاننىڭ «ت ن ۆ قازان» تەلەارناسى، وزبەكستان مەن تۇرىكمەنستاننىڭ مەملەكەتتىك ارنالارى تىكەلەي ەفيردە كورسەتىپ جاتىر.
ق ر مادەنيەت جانە اقپارات مينيسترلىگىنىڭ مالىمەتىنشە، دۇنيەجۇزىلىك كوشپەندىلەر ويىندارى تاريحىندا بۇنداي حالىقارالىق دەڭگەيدە اۋقىمدى تەلەحابار تاراتۋ ءبىرىنشى رەت قولعا الىنىپ وتىر.
ايتا كەتسەك، دۇنيەجۇزىلىك كوشپەندىلەر ويىندارى العاش رەت قىرعىزستاندا ءوتتى.