استانادا دەمالىس كۇندەرى وتەتىن جارمەڭكەدە ەكى وبلىستىڭ فەرمەرلەرى ونىمدەرىن ۇسىنادى

جارمەڭكەدە جامبىل جانە ۇلىتاۋ وبلىستارىنىڭ شارۋالارى ەت، بالىق، ءسۇت ونىمدەرى، سونداي-اق كوكونىس پەن جەمىس-جيدەكتىڭ كەڭ تاڭداۋىن ۇسىنادى. ونىمدەردىڭ فەرمەرلەردەن تىكەلەي جەتكىزىلۋى ازىق-تۇلىكتىڭ قولجەتىمدىلىگىن ارتتىرىپ قانا قويماي، وتاندىق وندىرۋشىلەردى قولداۋعا دا ىقپال ەتەدى.

اۋىل شارۋاشىلىعى تاۋار وندىرۋشىلەرى استاناعا 350 توننادان استام ءونىم اكەلەدى. ونىڭ ىشىندە 150 توننا كوكونىس پەن جەمىس-جيدەك، 80 توننا ەت پەن ەت ونىمدەرى، 50 توننا باقشا ونىمدەرى، 30 توننا ءسۇت ونىمدەرى، 11 توننا بالىق، 6 مىڭ دانا جۇمىرتقا جانە 30 توننادان استام باسقا دا ازىق-تۇلىك بولادى.

ەلوردا تۇرعىندارى مەن قوناقتارى فەرمەرلەردەن ءونىمدى تىكەلەي ساتىپ الۋمەن قاتار، وڭىرلەردىڭ شىعارماشىلىق ۇجىمدارى ونەر كورسەتەتىن كونسەرتتىك باعدارلامانى تاماشالاي الادى.

جارمەڭكە ساعات 9:00-دەن 18:00-گە دەيىن جۇمىس ىستەيدى.

ايتا كەتەيىك، بيىلعى جارمەڭكە «قازانات» يپپودرومى اۆتوتۇراعىنىڭ اۋماعىندا (قارقارالى تاس جولى، 1-مەكەنجايى) وتەدى.

سونىمەن قاتار جارمەڭكە ءوتىپ جاتقان كەزەڭدە قالا تۇرعىندارى مەن قوناقتارىنىڭ ىڭعايلىلىعى ءۇشىن №18، №37 جانە №303 اۆتوبۋس باعىتتارى قاتىنايتىن بولادى.

ايتا كەتەيىك، استاناداعى جارمەڭكەگە تۇركىستان وبلىسىنىڭ شارۋالارى 600 توننادان استام ءونىم اكەلدى.