استانادا بۇرشاق جاۋىپ، كولىك تەرەزەلەرى سىنىپ كەتتى

استانا. KAZINFORM - استانا قالاسىنىڭ اۋەجاي اۋماعىندا بۇرشاق جاۋىپ، كولىكتەردىڭ تەرەزەسى شىتىنادى، كەيبىرىندە سىنىپ كەتتى.

بۇرشاق ساعات شامامەن 17:50-18:00 شاماسىندا جاۋدى. حالىقارالىق اۋەجاي ماڭىنداعى كولىكتەر ءبىر ساتكە قوزعالىستى توقتاتىپ، جول جيەگىنە توقتادى.

- مۇنداي بۇرشاقتى ءبىرىنشى رەت كورىپ تۇرمىن. تاۋىق جۇمىرتقاسىنا جەتەتىن شىعار كولەمى. ەندى كولىكتىڭ الدىڭعى تەرەزەسىن اۋىستىرۋ كەرەك. ساقتاندىرۋ كومپانيالارى شىعىندى وتەمەيدى. ول وسى الدىڭعى تەرەزەنىڭ ءتۇپنۇسقاسى 80 مىڭ، كوشىرمەسى 40-45 مىڭ تۇرادى، - دەدى تاكسي جۇرگىزۋشىسى.

ايتا كەتەيىك، وسىعان دەيىن اتموسفەرالىق فرونتتاردىڭ ىقپالىمەن قازاقستاننىڭ باسىم بولىگىندە كۇن قۇبىلمالى بولاتىنى ايتىلدى. ياعني نايزاعاي جارقىلداپ، بۇرشاق پەن جاۋىن جاۋادى، داۋىل سوعادى. ەلىمىزدىڭ باتىسىندا، سولتۇستىك-باتىسىندا قاتتى جاڭبىر جاۋادى. تەك ەلىمىزدىڭ وڭتۇستىگىندە جانە وڭتۇستىك- شىعىسىندا جاۋىن-شاشىنسىز اۋا رايى كۇتىلەدى.

اۆتور
التىناي ساعىندىقوۆا