استانادا باقىلاۋشىنى نە ءۇشىن شىعاردى؟ ۋچاسكەلىك كوميسسيا تۇسىنىكتەمە بەردى

استانا. KAZINFORM - ۋچاسكەلىك كوميسسيا استاناداعى رەفەرەندۋمدە باقىلاۋشىنىڭ ۋچاسكەدەن شىعارىلعانىنا قاتىستى تۇسىنىكتەمە بەردى.

ۋچاسكەلىك كوميسسيا ءتوراعاسى حورلان تاشاتوۆانىڭ ايتۋىنشا، «ەركىندىك قاناتى» قورىنىڭ باقىلاۋشىسى سايلاۋشىلار تىزىمدەرىن ولاردىڭ جەكە دەرەكتەرىمەن بىرگە ۆيدەوعا تۇسىرگەن.

«بۇل قازاقستان رەسپۋبليكاسىنىڭ دەربەس دەرەكتەردى قورعاۋ تۋرالى زاڭناماسىن ورەسكەل بۇزۋ بولىپ سانالادى جانە قازاقستان رەسپۋبليكاسىنىڭ كونستيتۋتسيالىق زاڭى «قازاقستان رەسپۋبليكاسىنداعى سايلاۋ تۋرالى» زاڭىنا قايشى كەلەدى. سونىمەن قاتار، ول باسقا باقىلاۋشىلاردىڭ جۇمىسىنا كەدەرگى كەلتىرىپ، كوميسسيا مۇشەلەرىمەن داۋلاسقان، ءتارتىپ بۇزىپ، داۋىس بەرۋ پروتسەسىن قيىنداتتى. وسىعان بايلانىستى سايلاۋ پروتسەسىنە ارالاسۋ فاكتىسى بويىنشا اكت جاسالىپ، ءتيىستى شەشىم قابىلداندى»، - دەپ مالىمدەدى حورلان تاشاتوۆا.

«ەركىندىك قاناتى» قورى ولاردىڭ باقىلاۋشىسىن 2-سايلاۋ ۋچاسكەسىنەن شىعارىلعانىن جازعان بولاتىنبىز. بۇل ۋچاسكە ەۆرازيا ۇلتتىق ۋنيۆەرسيتەتىنىڭ 14-ستۋدەنتتەر ۇيىندە ورنالاسقان. قوردىڭ مالىمدەۋىنشە، باقىلاۋشى ۋچاسكەدە ورىن العان زاڭ بۇزۋشىلىقتاردى سۋرەتكە جانە ۆيدەوعا تۇسىرگەنى ءۇشىن شىعارىلعان. كوميسسيا باقىلاۋشىنى شىعارۋعا قاتىستى اكت جاساپ، ونىڭ كوشىرمەسىن بەرۋدەن باس تارتقان.

باس پروكۋراتۋرا مەن ىشكى ىستەر مينيسترلىگىنىڭ سوڭعى مالىمەتتەرى بويىنشا، رەفەرەندۋمدەگى داۋىس بەرۋ پروتسەسى تىنىش ءوتىپ، ورەسكەل زاڭ بۇزۋشىلىقتار تىركەلمەگەن. بۇگىن قازاقستاندا ا ە س بويىنشا رەفەرەندۋم وتۋدە. رەفەرەندۋمنىڭ ورتالىق كوميسسياسى ساعات 14:00 دەگى مالىمەتتەر بويىنشا، الدىن الا قاتىسۋ كورسەتكىشى 51,77 پايىزدى قۇراعانىن حابارلادى. رەفەرەندۋم زاڭدى دەپ تانىلدى.