استانادا بالالارعا «قايىرىمدىلىق» جەلەۋىمەن كوشەدە 340 ميلليون تەڭگە جيناتقان

استانا. KAZINFORM - ەلوردادا جاسوسپىرىمدەردى پايدالانىپ، قوعامدىق ورىنداردا زاڭسىز اقشا جيناۋ جاعدايى تىركەلدى.

استانا قالاسىنىڭ پروكۋراتۋراسى ساياباقتاردا، ويىن-ساۋىق ورتالىقتارىندا، قوعامدىق كولىكتەردە جانە كوشەلەردە رەيد جۇرگىزدى.

- بارلىعى 8 كامەلەتكە تولماعان (2008- 2010 -جىلدارى تۋعان) جاس ءوسپىرىم انىقتالدى. ولاردى ءۇش قايىرىمدىلىق قورى ەشقانداي شارت جاساماي، ۆولونتەر رەتىندە تارتقان (اكىمشىلىك قۇقىق بۇزۋشىلىق تۋرالى كودەكستىڭ 86-بابىنىڭ 3-بولىگىن بۇزۋ). اتالعان قورلار «قايىرىمدىلىق» دەگەن جەلەۋمەن شامامەن 340 ميلليون تەڭگە قارجى جيناعان، - دەگەن اقپارات الدىق.

قازىر اتالعان فاكتى بويىنشا (قىلمىستىق كودەكستىڭ 190-بابى 2-بولىگىنىڭ 1-تارماعى بويىنشا) قىلمىستىق ءىس قوزعالدى.

- كامەلەت جاسىنا تولماعان بالالاردى زاڭسىز ارەكەتكە تارتقانى ءۇشىن قور باسشىلارىنىڭ ءىس-ارەكەتىنە بولەك قۇقىقتىق باعا بەرىلەدى. وسى ورايدا كامەلەتكە تولماعانداردى قۇقىق بۇزۋشىلىققا تارتۋ قىلمىستىق جاۋاپكەرشىلىككە اكەلەتىنىن تۇسىندىرەمىز (قىلمىستىق كودەكستىڭ 132-بابى). ودان بولەك، ەڭبەك كودەكسىنىڭ 31-بابىندا كامەلەتكە تولماعاندارعا ەرەكشە ەڭبەك شارتتارى قاراستىرىلعان (16 جاستان باستاپ ەڭبەك شارتى مىندەتتى تۇردە جاسالۋى ءتيىس، ال 14 جاستان باستاپ زاڭدى وكىلىنىڭ كەلىسىمىمەن عانا راسىمدەلەدى)، - دەلىنگەن حابارلامادا.

سونداي-اق قالالىق پروكۋراتۋرا اتالعان تالاپتاردى بۇزعان جۇمىس بەرۋشىلەر اكىمشىلىك قۇقىق بۇزۋشىلىق تۋرالى كودەكستىڭ 86-بابى بويىنشا جاۋاپكەرشىلىككە تارتىلاتىنىن حابارلاپ وتىر.

- قايىرىمدىلىق قورلارى مەن اتا-انالار بالالاردىڭ زاڭسىز ارەكەتتەرگە قاتىسۋىنا جول بەرمەۋ ءۇشىن ولاردىڭ جۇمىسىنا، سونىڭ ىشىندە ۆولونتەرلىك جانە باسقا دا ءىس-شارالارعا قاتىسقاندا مۇقيات بولۋعا شاقىرامىز، - دەپ ەسكەرتەدى ۆەدومستۆو.

ەسكە سالا كەتسەك، ەندى قايىرىمدىلىق قورلارى ب ا ق-تا ەسەپ جاريالاۋعا مىندەتتەلمەك.

اۆتور

داۋلەت ىزتىلەۋ