استانادا بالاباقشا مەڭگەرۋشىلەرى بالالاردى تاماقتاندىرۋعا بولىنگەن 35 ميلليون تەڭگەنى جىمقىرعان

استانا. KAZINFORM - مەكتەپكە دەيىنگى 5 ۇيىم مەڭگەرۋشىلەرى جانە ولاردىڭ كومەكشىلەرى جاس بالالاردى تاماقتاندىرۋعا ارنالعان اقشا قاراجاتىن جىمقىرعانى ءۇشىن كىنالى دەپ تانىلدى.

استانا قالاسى پروكۋراتۋراسى باسپا ءسوز قىزمەتىنىڭ مالىمەتىنشە، بۇرىنعى بالاباقشا باسشىلارى مازىرگە سايكەس قاجەتتى ازىق-تۇلىك كولەمىن كورسەتە وتىرىپ وتىنىمدەر بەرگەن. بۇل رەتتە الدىن الا ءونىم بەرۋشىمەن قىلمىستىق ءسوز بايلاسىپ، ولار تولىق جەتكىزىلىم تۋرالى قۇجاتتارعا جالعان مالىمەتتەر ەنگىزگەن.

قىلمىستىق سحەمانىڭ باستاماشىسى جانە قىلمىستىق كەلىسىمنىڭ تىكەلەي ۇيىمداستىرۋشىسى بۇرىن سوتتالعان ولاردىڭ سىبايلاسى (ءونىم بەرۋشى) بولعان.

مەملەكەتتىك ايىپتاۋشى - پروكۋرور سوتتالعانداردىڭ كىناسىن دالەلدەيتىن بارلىق ايعاقتاردى ۇسىندى. سوت ۇكىمىمەن بالاباقشا مەڭگەرۋشىلەرىنە تاعايىندالعان بارلىق مەرزىمگە پروباتسيالىق باقىلاۋ بەلگىلەنە وتىرىپ، 2 جىلدان 3 جىلعا دەيىنگى مەرزىمگە باس بوستاندىعىن شەكتەۋگە، ءماجبۇرلى ەڭبەككە تارتۋعا جانە مەملەكەتتىك قىزمەتتە قىزمەت اتقارۋعا ءومىر بويىنا تىيىم سالۋعا سوتتالدى.

جەڭىلدەتەتىن ءمان- جايلار رەتىندە، مەڭگەرۋشىلەردىڭ كەلتىرىلگەن زالالدى وتەگەنى، كىنالارىن تولىق مويىنداعانى جانە ولاردىڭ كىشكەنتاي بالالارىنىڭ بار ەكەندىگى تانىلدى. ۇقساس قىلمىستار ءۇشىن وتەلمەگەن سوتتىلىعى بولعان ولاردىڭ سىبايلاسى 4 جىل باس بوستاندىعىنان ايىرىلدى.

جىمقىرعان 35 ميلليون تەڭگەدەن استام قاراجاتتىڭ بارلىعى بيۋدجەتكە قايتارىلدى.

ۇكىم زاڭدى كۇشىنە ەندى.

اۆتور

ەلميرا ورالبايەۆا