استانادا اۆتوبۋس جولاقىسى قانشا تەڭگەگە قىمباتتايدى

استانا. KAZINFORM - ەلوردالىق كولىك جانە جول-كولىك ينفراقۇرىلىمىن دامىتۋ دەپارتامەنتىنىڭ باسشىسى اسحات قاراعويشين قوعامدىق كولىكتە جول ءجۇرۋ قۇنىن ارتتىرۋ جوسپارى تۋرالى ايتىپ بەردى.

«سوڭعى 10 جىلدا تاسىمالداۋشىلاردىڭ شىعىندارى ايتارلىقتاي ءوستى. مىسالى بۇرىن ديزەل وتىنى 107 تەڭگە بولسا، قازىر 295 تەڭگە تۇرادى. ياعني، باعاسى 275 پايىزعا ءوستى. اۆتوبۋس قۇنى مەن جۇرگىزۋشىلەردىڭ جالاقىسىن قوسا العاندا، باسقا شىعىندار بويىنشا وسىعان ۇقساس جاعداي قالىپتاستى. قازىر استانادا جول ءجۇرۋ قۇنى قولما-قول اقشاسىز - 90 تەڭگە، قولما-قول تولەۋ كەزىندە - 180 تەڭگە. مىسالى، الماتىدا قوعامدىق كولىكتە جول ءجۇرۋ قۇنى قولما-قول اقشاسىز - 100 تەڭگە، قولما-قول تولەۋ كەزىندە - 200 تەڭگە. اقمولا وبلىسىندا قوعامدىق كولىكتە جول ءجۇرۋ ءتاريفى قولما-قول اقشاسىز تاسىلمەن - 100 تەڭگە، قولما-قول اقشامەن - 180 تەڭگە. قوستاناي وبلىسىندا جول ءجۇرۋ قۇنى - 100 تەڭگە، قولما-قول اقشامەن تولەۋ كەزىندە - 170 تەڭگە»، - دەپ مىسال كەلتىردى سپيكەر قالالىق قوعامدىق كەڭەس وتىرىسىندا.

ونىڭ ايتۋىنشا، قازىرگى تاريف ساقتالعان جاعدايدا سۋبسيديالار مولشەرى جىلدان جىلعا ارتىپ كەلەدى.

«وتكەن جىلى سۋبسيديا 34 ميلليارد تەڭگەنى قۇراسا، قازىر 38 ميلليارد تەڭگەگە دەيىن ءوستى. وسىعان بايلانىستى 2024-جىلى ءبىز قوعامدىق كولىكتە جول ءجۇرۋ قۇنىن قولما-قول اقشاسىز ەسەپ ايىرىسۋ كەزىندە 110 تەڭگەگە دەيىن جانە قولما-قول 220 تەڭگەگە دەيىن ارتتىرۋدى ۇسىنامىز. بۇل رەتتە سۋبسيديا سوماسى 2024-جىلى 3 ميلليارد تەڭگەگە تومەندەيدى»، - دەپ تولىقتىردى سپيكەر.