استانادا ات سپورتىنان اۋقىمدى جارىستار وتەدى

استانا. قازاقپارات – 30-مامىر 1-ماۋسىم ارالىعىندا استانا قالاسىندا «ارعىماق» ات-سپورتتىق ساۋىقتىرۋ كەشەنى بازاسىندا اۋقىمدى حالىقارالىق جارىستار - كونكۋردان ەۋرازيالىق ليگانىڭ الەم كۋبوگىنىڭ كەزەڭى (FEI CSI 1*- W) جانە اتپەن مانەرلەپ ءجۇرۋ بويىنشا حالىقارالىق تۋرنير (FEI CDI 1*) وتەدى.

ق ر ات سپورتى فەدەراتسياسى باسپا ءسوز قىزمەتىنىڭ حابارلاۋىنشا، جارىسقا الىس جانە جاقىن شەتەلدەن التى ەلدىڭ مىقتى قۇراما كوماندالارى قاتىسادى. ءىس-شارا حالىقارالىق ستاندارتتارعا سايكەس حالىقارالىق ات سپورتى فەدەراتسياسىنىڭ (FEI) قولداۋىمەن وتكىزىلەدى.

ءۇش كۇن ىشىندە 60 تان اسا ۇزدىك سپورتشى ءارتۇرلى كەدەرگىلەردەن تۇراتىن مارشرۋتتار مەن اتپەن جۇرۋدەن ءوز شەبەرلىكتەرىن كورسەتەدى.

كونكۋر - ول جىلقىنىڭ جانە شاباندوزدىڭ كەدەرگىلەردەن ءوتۋ قابىلەتىن انىقتايتىن وليمپيادالىق سپورت ءتۇرى. ماقسات - قاشىقتىقتى قاتەلىكسىز ءارى مۇمكىندىگىنشە قىسقا ۋاقىت ىشىندە ەڭسەرۋ.

اتپەن مانەرلەپ ءجۇرۋ - ات سپورتىنىڭ جوعارى دەڭگەيى، مۇندا شاباندوز بەن ات ارنايى ارەنادا دالدىكپەن جانە ۇيلەسىمدىلىكپەن ءتۇرلى قيمىلداردى ورىندايدى.

استانادا الەم كۋبوگىنىڭ كەزەڭىن قازاقستاندا وتكىزۋ ات سپورتىنا دەگەن قىزىعۋشىلىقتىڭ ارتىپ كەلە جاتقانىن كورسەتەدى. بۇل - تەك ەل ءۇشىن عانا ەمەس، بارلىق ات سپورتى جانكۇيەرلەرى ءۇشىن ماڭىزدى سپورتتىق ءىس-شارا بولماق. اۋقىمدى دەڭگەيدەگى جارىستار قازاقستاندىق سپورتشىلارعا ءوز شەبەرلىكتەرىن ارتتىرىپ، شەتەلدىڭ مىقتى شاباندوزدارىمەن باسەكەگە ءتۇسىپ، حالىقارالىق تۋرنيرلەرگە بىلىكتىلىك جولدامالارىن الۋ مۇمكىندىگىن بەرەدى.

وسىعان دەيىن قازاقستاندىقتار ات سپورتىنان تاشكەنتتە وتكەن ءىرى تۋرنيرلەردە ءساتتى ونەر كورسەتكەنى تۋرالى جازدىق.