استانادا العاش رەت ۇلتتىق سپورت كۇنى اتاپ ءوتىلدى

استانا. KAZINFORM - بۇگىن ەلورداداعى «ارعىماق» ات-سپورتتىق ساۋىقتىرۋ كەشەنىندە ناۋرىز مەيرامى اياسىندا ۇلتتىق سپورت كۇنىنە ارنالعان «ناۋرىزناما: ۇلتتىق سپورت كۇنى» اتتى مەرەكەلىك ءىس-شارا ءوتتى.

اتالعان ءىس-شاراعا تۋريزم جانە سپورت ءمينيسترى ەرمەك مارجىقپايەۆ، استانا قالاسى اكىمىنىڭ ورىنباسارى ەسەت بايكەن، ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ، ۇلتتىق سپورت ارداگەرلەرى، ۇلتتىق سپورت فەدەراتسيالارىنىڭ پرەزيدەنتتەرى، سپورتشىلار، ديپلوماتيالىق ميسسيالاردىڭ باسشىلارى مەن وكىلدەرى، سونداي-اق ەلوردا تۇرعىندارى مەن قوناقتارى قاتىستى.

تۋريزم جانە سپورت ءمينيسترى ەرمەك مارجىقپايەۆ قۇتتىقتاۋ سوزىندە ەلىمىزدە ۇلتتىق سپورت تۇرلەرىنە دەگەن قىزىعۋشىلىق پەن سۇرانىس ارتىپ كەلە جاتقانىن ەرەكشە اتاپ ءوتتى.

«قازاقتىڭ ۇلتتىق ويىندارى - مادەني-پاتريوتتىق تاربيە بەرۋدە ۇتىمدى قۇرال. دەنساۋلىقتى نىعايتۋعا، سالاماتتى ءومىر سالتىن ناسيحاتتاۋعا ەلەۋلى سەپتىگىن تيگىزەدى. بۇگىن ەل ىشىندە وتكىزىلىپ جاتقان ات جارىستار، قۇسبەگىلىك جانە اسىق اتۋ، توعىزقۇمالاق، ساداق اتۋ سياقتى تۋرنيرلەر ازاماتتارعا شىنايى مەرەكەنى سەزىنۋگە مۇمكىندىك بەرۋدە» - دەدى مينيستر.

ءوز كەزەگىندە ۇلتتىق سپورت تۇرلەرى قاۋىمداستىعىنىڭ پرەزيدەنتى يسلامبەك سالجانوۆ ەلىمىزدە ناۋرىز مەيرامىن تويلاۋدىڭ جاڭا تۇجىرىمداماسى اياسىندا 20-ناۋرىزدىڭ ۇلتتىق سپورتقا ارنالۋى بۇكىل ۇلتتىق سپورت ءۇشىن قۋانىشتى جاڭالىق ەكەنىن ايتتى.

«كەيىنگى جىلدارى مەملەكەت باسشىسى قاسىم- جومارت توقايەۆتىڭ قولداۋىمەن ەلىمىزدە ۇلتتىق سپورت قارقىندى دامىپ كەلەدى. بيىل قىركۇيەك ايىندا ەلوردادا پرەزيدەنتتىڭ باستاماسىمەن 5-شى دۇنيەجۇزىلىك كوشپەندىلەر ويىندارى وتەدى. بۇل اۋقىمدى حالىقارالىق ءىس- شارا ۇلتتىق سپورتتى ودان ءارى دامىتۋعا تىڭ سەرپىن بەرەدى» - دەدى يسلامبەك سالجانوۆ.

استانا قالاسى اكىمىنىڭ ورىنباسارى ەسەت بايكەن «ارعىماق» ات-سپورتتىق ساۋىقتىرۋ كەشەنىنە جينالعان قاۋىمدى مەيراممەن قۇتتىقتاپ، مەرەكە كۇندەرى ەلوردانىڭ بارلىق اۋدانىندا ۇلتتىق سپورت تۇرلەرى بويىنشا جارىستار وتەتىنىن جەتكىزدى.

مەرەكەلىك ءىس-شارا اياسىندا كوكپار، اۋدارىسپاق، تەڭگە ءىلۋ، قىز قۋۋدان كورسەتىلىمدەر جانە توعىزقۇمالاق پەن اسىق اتۋدان شەبەرلىك سىنىپتارى ۇيىمداستىرىلدى. قوناقتارعا قازاقى تازى جانە بۇركىت كورسەتىلىپ، قۇسبەگىلىك ونەر تانىستىرىلدى.

سونىمەن قاتار كوكپاردان استانا مەن ا ق ش قۇرامالارى اراسىنداعى جولداستىق كەزدەسۋ كورەرمەندەر ءۇشىن كەرەمەت توسىنسىي بولدى.

مەيرامعا وراي ءوزىنىڭ جەتىستىكتەرىمەن ۇلتتىق سپورتتى دارىپتەپ جۇرگەن ۇلتتىق سپورت ارداگەرلەرى مەن قايراتكەرلەر ماراپاتتالدى. ولاردىڭ قاتارىندا كوكپاردان ك س ر و-نىڭ توعىز دۇركىن چەمپيونى ءابىلحان داۋىلبايەۆ، توعىزقۇمالاقتان ەكى دۇركىن ەل چەمپيونى مەيرامقۇل نوعايبايەۆ، قازاق كسر ەڭبەك سىڭىرگەن جاتتىقتىرۋشىسى جۇمابەك مەيرامعاليەۆ، بەلگىلى سپورت جۋرناليسى، جازۋشى نەسىپ ءجۇنىسباي ۇلى، ەڭبەك سىڭىرگەن جاتتىقتىرۋشى قۇلامحان جاقىپوۆ، اسىق اتۋدان ۇلتتىق قۇرامانىڭ باس باپكەرى جومارت سابىرجانوۆ، اتبەگى مەيرامبەك چاكەنوۆ بار.

«ۇلتتىق سپورت ارداگەرى رەتىندە ەڭبەگىمىزدى ەلەپ، ماراپاتتاپ جاتقانىنا قۋانىشتىمىز. ءقازىر ەلىمىزدەگى جاس سپورتشىلارعا مۇمكىندىك كوپ. الداعى 5-شى دۇنيەجۇزىلىك كوشپەندىلەر ويىندارىندا ۇلتتىق قۇرامامىزعا جەڭىس تىلەيمىن»، - دەدى ءابىلحان داۋىلبايەۆ.

ايتا كەتەيىك، ۇلتتىق سپورت قاۋىمداستىعىنىڭ قۇرامىنا بۇگىندە 10 فەدەراتسيا كىرەدى. ولار: بايگە، كوكپار، اۋدارىسپاق، ساداق اتۋ، جامبى اتۋ، تەڭگە ءىلۋ، قۇسبەگىلىك، اسىق اتۋ، «JORYQ» جانە ت. ب. وتكەن جىلى فەدەراتسيا سپورتشىلارى 12 حالىقارالىق جارىسقا قاتىسىپ، 95 مەدال جەڭىپ الدى، ونىڭ 35 ى - التىن.

اۆتور

كۇنسۇلتان وتارباي