استانادا الاياق ايەل ونداعان ادامدى الداپ كەتتى
استانا. KAZINFORM - استانادا الاياق ايەل ونداعان ادامدى الداپ كەتتى، - دەپ حابارلايدى Massaget.kz ءتىلشىسى.
جەدەل-ىزدەستىرۋ شارالارى بارىسىندا الماتى اۋدانى پ ب كريمينالدىق پوليتسيا قىزمەتكەرلەرى الاياقتىق جاسادى دەگەن كۇدىكپەن ازاماتشانى ۇستادى. ول قالا تۇرعىندارىنىڭ اقشاسىن الداپ يەمدەنگەن 21 جاستاعى قىز بولىپ شىقتى.
الاياق الەۋمەتتىك جەلىلەردە اقشا ۇتىسى تۋرالى تارتىمدى حابارلاندىرۋلار ورنالاستىرعان. الايدا ۇتقان اقشانى الۋ ءۇشىن ادامدار سول سومادان 10-20 پايىز كولەمىندە قاراجات تولەۋى قاجەت بولعان. جەرگىلىكتى تۇرعىندار كورسەتىلگەن نومىرلەرگە اقشا جىبەرگەننەن كەيىن، الاياق ولاردى بۇعاتتاپ تاستاعان.
ۇستالعان ايەل ءوز كىناسىن مويىندادى. الاياقتىق فاكتىسى بويىنشا الدىن الا تەرگەۋ جۇمىستارى جۇرگىزىلىپ جاتىر. كۇدىكتىنىڭ وسىعان ۇقساس 10 وقيعاعا قاتىسى بار ەكەندىگى انىقتالدى.
پوليتسيا ازاماتتاردى ءتۇرلى تاقىرىپتاعى كونكۋرستار، ساۋالنامالار جانە داۋىس بەرۋلەر تۇرىندە تاراتىلاتىن كۇماندى سىلتەمەلەرگە وتپەۋدى جانە جەكە دەرەكتەرىن ەنگىزبەۋدى سۇرايدى.