استانادا «ءال جازيرا اپتالىعى» باستالدى

استانا. KAZINFORM - ەلوردادا Maqsut Narikbayev ۋنيۆەرسيتەتىندە «Al Jazeera اپتالىعىنىڭ» سالتاناتتى اشىلۋى ءوتتى. شارانى MNU حالىقارالىق جۋرناليستيكا مەكتەبى، ق ر پرەزيدەنتى تەلەراديوكەشەنى جانە Al Jazeera Media Network ازىرلەگەن.

اپتالىقتىڭ اشىلۋىندا Maqsut Narikbayev University باسقارما ءتوراعاسى تالعات نارىكبايەۆ پەن Al Jazeera مەديا ينستيتۋتىنىڭ ديرەكتورى ەمان ءال-امري ىنتىماقتاستىق تۋرالى مەموراندۋمعا قول قويدى.

تالعات نارىكبايەۆتىڭ ايتۋىنشا، بۇل مەموراندۋم اكادەميالىق سالاداعى ەكىجاقتى ءوزارا ءىس- قيمىلعا جول اشادى جانە قازاقستاندىق جۋرناليستيكا ءۇشىن الەمدىك دەڭگەيدەگى كاسىبي كادرلاردى دايارلاۋعا ىقپال ەتەدى.

«Al Jazeera - الەمدەگى ەڭ ءىرى جانە ىقپالدى جاڭالىق جەلىلەرىنىڭ ءبىرى. سوندىقتان بۇل ءبىزدىڭ ۋنيۆەرسيتەت ءۇشىن، ەل ءۇشىن جانە قازىر وسىندا وقيتىن ستۋدەنتتەر ءۇشىن كەرەمەت مۇمكىندىك. وسى اپتادا ءبىزدىڭ ستۋدەنتتەر سالاداعى ەڭ ۇزدىك ساراپشىلاردان ءتالىم الىپ، داعدىلارىن دامىتا الادى. وسى ىنتىماقتاستىقتىڭ ارقاسىندا ءبىز وزەكتى ماسەلەلەردى شەشۋگە، سىندارلى ديالوگتى ىنتالاندىرۋعا جانە ارينە وزگەرىستەردى شابىتتاندىرۋعا ۇيرەنىپ جاتقان جۋرناليستەرىمىزدىڭ كەلەسى بۋىنىنا مول مۇمكىندىك بەرۋگە تىرىسامىز»، - دەدى ت. نارىكبايەۆ.

«Al Jazeera اپتالىعىندا» MNU حالىقارالىق جۋرناليستيكا مەكتەبىنىڭ جۇزدەن استام ستۋدەنتتەرى جەتەكشى حالىقارالىق تەلەكومپانيانىڭ ماماندارى مەن وقىتۋشىلارىنىڭ ءبىر اپتالىق ترەنينگىنە قاتىسادى. وندا «جاڭالىقتار رەپورتاجى»، «داتا جۋرناليستيكا»، «موبيلدى جۋرناليستيكا»، «سيفرلىق ستوريتەللينگ» تاقىرىپتارىندا 100 ساعاتتان استام تەوريالىق جانە پراكتيكالىق ساباقتار ۇسىنىلادى.

بۇدان بولەك Al Jazeera ساراپشىلارى زاماناۋي جۋرناليستيكانىڭ وزەكتى ماسەلەلەرى بويىنشا 4 قوعامدىق ءدارىس وتكىزەدى.

«ءبىز قازىر نارىق كورىپ وتىرعان قاجەتتىلىكتەرمەن قاتار ءجۇرۋ ءۇشىن دە جۇمىس ىستەپ جاتىرمىز. ءوز تاراپىمىزدان بارلىق قاجەتتى اسپەكتىلەردى ەنگىزۋگە تىرىسامىز. ارينە، بۇل كەلىسىم ءبىزدىڭ الەۋەتىمىزدى ودان ءارى كەڭەيتىپ، وسى تۇرعىدا جۇمىس ىستەي باستاۋىمىز ءۇشىن تاماشا مۇمكىندىك بولارىنا سەنىمدىمىن. مەنىڭ ويىمشا، بىزدە ورتاق قۇندىلىقتار كوپ جانە دۇرىس باعىتتا كەلە جاتىرمىز»، - دەيدى Al Jazeera مەديا ينستيتۋتىنىڭ ديرەكتورى ەمان ءال-امري.

باعدارلاما سوڭىندا ستۋدەنتتەر كۋرستىق جوبالارىن قورعايدى جانە Al Jazeera Media Institute سەرتيفيكاتتارىن الادى. سونداي-اق، كەلىسىمدە تاعىلىمدادان ءوتۋ دە قاراستىرىلعان.

«مۇنداي حالىقارالىق دەڭگەيدەگى وقىتۋ قازاقستاندا عانا ەمەس، تۇتاس وڭىردە العاش رەت جۇرگىزىلىپ وتىر. Al Jazeera مەديا ينستيتۋتى ترەنينگكە قاتىسۋشىلاردى جۇمىسقا شاقىرۋعا دا دايىن ەكەنىن ءبىلدىردى. Al Jazeera تەلەكومپانياسىنىڭ الەم بويىنشا 45 فرونت كەڭسەسى مەن فيليالدارى بار. قازاقستان دا كاسىبي مامانداردى ىزدەۋ جانە كادرلاردى ىرىكتەۋ تۇرعىسىنان وتە قىزىقتى بولىپ وتىر»، - دەدى MNU رەكتورى سەرگەي پەن.

ايتا كەتەيىك، ق ر پرەزيدەنتىنىڭ تەلەراديوكەشەنى - قازاقستاننىڭ ەڭ ءىرى مەدياكومپانيالارىنىڭ ءبىرى، ونىڭ قۇرامىنا Jibek Joly ،Silk Way ،Silk Way Cinema تەلەارنالارى، قازاقستانداعى ەڭ تاريحي KAZINFORM حالىقارالىق اقپاراتتىق اگەنتتىگى جانە دەرەكتى كينو ورتالىعى كىرەدى.

Al Jazeera تەلەكومپانياسى - 1996 -جىلى قاتار ءامىرىنىڭ جارلىعىمەن قۇرىلعان حالىقارالىق تەلەكومپانيا. تەلەكومپانيا الەمنىڭ كوپتەگەن ەلدەرىندە اراب جانە اعىلشىن تىلدەرىندە حابار تاراتادى، 50 دەن استام شەتەلدىك بيۋرولارى بار. Al Jazeera Documentary ارناسىندا دەرەكتى كونتەنت كورسەتىلەدى.

اۆتور

ايجان سەرىكجان قىزى