استانادا 5 مەتر بيىكتىكتەن قۇلاعان سيرك ءارتىسىنىڭ قازىرگى جاعدايى بەلگىلى بولدى

استانا. KAZINFORM - ەلوردا سيركىندە ونەر كورسەتۋ كەزىندە ءارتىس بيىكتەن قۇلاپ، جاراقات الدى. ناۋقاستىڭ قازىرگى جاعدايى تۋرالى قالالىق دەنساۋلىق ساقتاۋ باسقارماسى حابارلادى.

جەدەل جاردەم بريگاداسى وقيعا ورنىنا دەرەۋ جەتتى، قازىر ناۋقاس اۋرۋحانادا ەم الىپ جاتىر.

- پاتسيەنتكە باس جاراقاتى مەن مي شايقالۋى دياگنوزى قويىلدى. جالپى جاعدايى - ورتاشا اۋىر، تۇراقتى، - دەپ حابار الدىق قالالىق دەنساۋلىق ساقتاۋ باسقارماسىنان.

ايتا كەتسەك، كەشە بەلگىلى بولعانداي، شارم-ەش-شەيح اۋەجايىندا استاناعا دەيىن باراتىن DV5270 رەيسىنە وتىرار كەزدە ءۇش قازاقستاندىق ايەلگە جارناما تاقتاسى قۇلادى. وقيعانىڭ سالدارىنان قازاقستاندىق ايەل مەرت بولدى، تاعى ەكى وتانداسىمىز جاراقات الدى.

قازا تاپقان ايەلدىڭ ۇلى دا جاتىن ورىنمەن قامتاماسىز ەتىلدى. قازاقستان ەلشىلىگىمەن بارلىق قاجەتتى كونسۋلدىق، قۇقىقتىق جانە گۋمانيتارلىق كومەكتەر كورسەتۋ بويىنشا جۇمىس جۇرگىزىلىپ جاتىر.

شارم-ەش-شەيح اۋەجايىندا كوز جۇمعان ايەل قۇقىق قورعاۋ سالاسىندا جۇمىس ىستەگەن.