استانادا 5-دۇنيەجۇزىلىك كوشپەندىلەر ويىندارىنا ارنالعان وڭىرلەر شەرۋى ءوتتى
استانا. KAZINFORM - استانادا قازاقستاننىڭ 20 وڭىرىنەن 200 دەن استام وكىلدىڭ قاتىسۋىمەن «بىرلىك كەرۋەنى» اتتى اۋقىمدى ءىس-شارا ءوتتى. سپورتشىلاردان، باتىرلاردان جانە قوعام قايراتكەرلەرىنەن قۇرالعان كەرۋەن ءار ءوڭىردىڭ ءداستۇرلى ستيلىندە بەزەندىرىلىپ، شەرۋ جاسادى، دەپ جازدى ەلوردا اكىمدىگىنىڭ رەسمي سايتى.
كەرۋەننىڭ باستى مىندەتى - وڭىرلەردەن ەلورداعا ويىندار تاريحىنىڭ اجىراماس بولىگى بولىپ سانالاتىن قاسيەتتى سۋدى ويىنداردىڭ اشىلۋ سالتاناتىنا جەتكىزۋ. «بىرلىك كەرۋەنى» 5- دۇنيەجۇزىلىك كوشپەندىلەر ويىندارىنىڭ اشىلۋ سالتاناتىنىڭ باستى كيەلى ەلەمەنتى رەتىندە قاسيەتتى سۋدى پايدالانۋ ءداستۇرىن جالعاستىرادى.
ساعات 16.00 دەن باستاپ ەكسپو اۋماعىندا ەلوردا تۇرعىندارى مەن قوناقتارى الدىندا دي-دجەي ونەر كورسەتىپ، ينتەراكتيۆتى ويىندار وتكىزىلدى. ودان ءارى ساعات 17.00 دە تەاترلاندىرىلعان باعدارلامامەن جانە 20 وڭىردەن كەلگەن وكىلدەردىڭ شەرۋى ارقىلى رەسمي اشىلۋ ءوتتى.
قاتىسۋشىلار مەن كورەرمەندەر الدىندا استانا اكىمى جەڭىس قاسىمبەك پەن ق ر سپورت جانە تۋريزم ءمينيسترى ەربول مىرزابوسىنوۆ قۇتتىقتاۋ ءسوز سويلەدى.
ءىس-شارا بارىسىندا كەرۋەن ەلىمىزدىڭ بارلىق وڭىرىنەن جينالعان قاسيەتتى سۋدى استاناعا جەتكىزدى. بۇل سۋ قازاقستان حالقىنىڭ ورتاق كۇشى مەن بىرلىگىن بىلدىرەدى. شەرۋدى شىعارماشىلىق ۇجىمدار مەن قازاقستاندىق ەسترادا جۇلدىزدارى جالعاستىردى.
ءىس-شارا بارىسىندا «Royal beats» بارابانشىلار ءانسامبلى، «جوشى» توبى، سونداي-اق Aro، قۋاندىق راحىم، مارجان اراپبايەۆا، عازيزحان شەكەربەك، اقبوتا كەرىمبەكوۆا، Ayree، ميراس جۇگىنىسوۆ جانە «بايتەرەك» توبى سەكىلدى ونەر يەلەرى كونسەرت وتكىزدى.
ءىس-شارا ەكسپو اۋماعىندا ءوتتى.
ەستەرىڭىزگە سالا كەتەيىك، وسىعان دەيىن ەلىمىزدىڭ ءار ءوڭىرىنىڭ كيەلى سانالاتىن بۇلاق كوزىنەن تورسىق تولى سۋ جينالعان بولاتىن. ءدال وسى سۋ 5- دۇنيەجۇزىلىك كوشپەندىلەر ويىندارىنىڭ اشىلۋ سالتاناتىنىڭ نەگىزگى ەلەمەنتى بولماق.
ايتا كەتەيىك، 5- دۇنيەجۇزىلىك كوشپەندىلەر ويىندارى استانادا 8-13-قىركۇيەك ارالىعىندا وتەدى. وعان الەمنىڭ 89 ەلىنەن 2500 دەن استام ادام قاتىسادى.