استانادا 3 مىڭ دومبىراشى ءبىر مەزەتتە كۇي شەرتىپ، رەكورد ورناتتى
استانا. KAZINFORM - ەلوردادا ءبىر مەزەتتە ءۇش مىڭنان اسا دومبىراشى «بالبىراۋىن» كۇيىن ورىنداپ، ونەر الەمىندەگى بۇل ەرەكشە جارقىن وقيعا قازاقستاننىڭ گيننەس رەكوردتارىن تىركەۋ كىتابىنا ەندى، دەپ جازدى استانا اكىمدىگى.
«Qazaqstan» جەڭىل اتلەتيكالىق سپورت كەشەنىندە «ناعىز قازاق قازاق ەمەس، ناعىز قازاق - دومبىرا» اتتى اۋقىمدى ءىس- شارادا ءۇش مىڭنان استام استانالىق دومبىرا ۇيىرمەلەرىنە قاتىسۋشىلار قۇرمانعازى ساعىرباي ۇلىنىڭ شوقتىعى بيىك «بالبىراۋىن» كۇيىن ءبىر مەزگىلدە كۇمبىرلەتتى.
«قازاقستاندا مەملەكەتتىك شىعارماشىلىق تاپسىرىس جوباسى 2021 -جىلدان باستاپ ىسكە اسىرىلىپ جاتىر. ونىڭ ماقساتى - 4 پەن 17 جاس ارالىعىنداعى بالالار مەن جاسوسپىرىمدەردى تەگىن ۇيىرمەلەرمەن قامتۋ، ولاردىڭ بوس ۋاقىتىن ءتيىمدى وتكىزىپ، ونەرگە دەگەن قىزىعۋشىلىعىن ارتتىرۋ. مىنە، بۇگىن استانا قالاسىندا وسىنداي دومبىرا ۇيىرمەسىنە قاتىساتىن ءۇش مىڭنان اسا وقۋشىنى جيناپ، ءبىر مەزەتتە كۇي ورىنداتىپ، ەلىمىزدىڭ رەكوردتار كىتابىنا ەنۋدى ماقسات تۇتتىق. ادەتتە كۇي ۇيىرمەسىنە قاتىسۋشىلار اۋەلى «بالبىراۋىن» كۇيىنەن باستاپ ۇيرەنەدى عوي، سوندىقتان كۇي اتاسىنىڭ وسى داۋىلپاز كۇيى تاڭدالدى. سونىمەن قاتار ۇيىرمەگە قاتىسۋشىلاردىڭ ونەرىن باعالاماقپىز. مۇنداي اۋقىمداعى ءىس- شارا ەلىمىزدە العاش رەت ۇيىمداستىرىلىپ وتىر»، - دەدى استانا قالاسى بويىنشا مەملەكەتتىك شىعارماشىلىق تاپسىرىستى ىسكە اسىرۋ مەكەمەسىنىڭ باسشىسى ەرلان جالعاس.
«بۇعان دەيىن ەشقاشان ءبىر زالدا 3200 دەن استام مۋزىكانت كۇي نەمەسە باسقا مۋزىكالىق شىعارما ورىنداپ كورگەن جوق. بۇل جونىندە وسى ءىس- شارا وسىعان دەيىنگى ەلىمىزدە ورناتىلعان رەكوردتاردى باسىپ وزىپ وتىر. الەم بويىنشا دا ەڭ ۇلكەن مۋزىكالىق رەكوردتاردىڭ ءبىرى بولعالى وتىر دەۋىمىزگە بولادى. دەسە دە ءبىزدىڭ نەگىزگى ماقساتىمىز - ەل ايماعى بويىنشا قازاقستان رەكوردتار كىتابىنا تىركەۋ. ال بۇل ماقساتىمىزعا بۇگىن تولىق جەتتىك دەپ ايتا الامىز. وسى پروتسەستى ارنايى ساراپشىلارىمىز باقىلاپ وتىردى. بالالاردىڭ سانىن 8 ساراپشى، ال كۇيدىڭ ورىندالۋ ساپاسىن 4 ساراپشى سارالادى»، - دەدى قازاقستان گيننەس رەكوردتار كىتابىنىڭ رەسمي وكىلى قۋاندىق قۇدايبەرگەنوۆ.
كۇي مەرەكەسىنە مادەنيەت قايراتكەرى شولپان قورعانبەك ديريجەرلىك ەتتى.
ۇيىمداستىرۋشىلاردىڭ ايتۋىنشا، الداعى ۋاقىتتا دا ۇيىرمەلەردىڭ قاتىسۋىمەن وسىنداي ءىس- شارالار ءجيى وتكىزىلەدى.