استانادا 13 مىڭعا جۋىق جاس ءوسپىرىم قىزعا پاپيللوما ۆيرۋسىنا قارسى ۆاكسينا سالىنا باستادى

استانا. KAZINFORM - ەلوردادا ادام پاپيللوماۆيرۋسىنا (ا پ ۆ) قارسى ۆاكسيناتسيا ناۋقانى باستالدى. بۇل شارا قىزداردىڭ دەنساۋلىعىن قاتەرلى ىسىكتىڭ ەڭ قاۋىپتى تۇرلەرىنىڭ بىرىنەن قورعاۋعا باعىتتالعان.

بۇگىنگى تاڭدا قالادا ۆاكسينانىڭ 12 مىڭنان استام دوزاسى بار. جوسپارلى تارتىپپەن ۆاكسيناتسيا قالا بويىنشا بارلىعى 13 مىڭعا جۋىق 11 جاسار قىزدارعا جاسالادى. سونداي-اق 12-13 جاس ارالىعىنداعى قىزدارعا تولىقتىرا يممۋنداۋ قاراستىرىلعان.

ۆاكسيناتسيا مەكتەپتەردىڭ مەديتسينالىق كابينەتتەرىندە اتا-انالاردىڭ نەمەسە زاڭدى وكىلدەردىڭ اقپاراتتاندىرىلعان كەلىسىمىن العاننان كەيىن جۇرگىزىلەدى. اتا-انالاردىڭ قالاۋى بويىنشا ۆاكسيناتسيا تىركەلگەن جەرى بويىنشا ەمحانالاردا دا جۇرگىزىلۋى مۇمكىن.

«مەن ۆاكسينا تۋرالى مەدبيكەدەن العان بۋكلەتتەن وقىدىم. سودان كەيىن انامنان سۇرادىم، ول كەلىستى. بۇگىن ۆاكسينا الدىم، اۋىرعان جوق، قورىقپادىم. قازىر ءوزىمدى جاقسى سەزىنەمىن»، — دەدى  75-مەكتەپ-گيمنازياسىنىڭ 8-سىنىپ وقۋشىسى ادەل ۋاگيزوۆا.

ا پ ۆ ۆاكسيناسى ءوزىنىڭ تيىمدىلىگى مەن قاۋىپسىزدىگىن حالىقارالىق دەڭگەيدە دالەلدەدى. بۇگىنگى تاڭدا بۇل ۆاكسينا الەمنىڭ 135 ەلىندە قولدانىلادى، سونىڭ ارقاسىندا ءبىرقاتار ەلدەردە ايەلدەر اراسىندا ا پ ۆ تارالۋى بۇگىنگى كۇنى � عا تومەندەدى.

«11 جاستان باستاپ قىزدارعا ا پ ۆ- نا قارسى ۆاكسينا سالۋ - وسكەلەڭ ۇرپاقتىڭ بولاشاق دەنساۋلىعىن قورعاۋداعى ماڭىزدى قادام. ءبىزدىڭ ماقساتىمىز - بارىنشا قورعانىستى قامتاماسىز ەتۋ جانە حالىق اراسىندا سىرقاتتانۋشىلىقتى ازايتۋ. ءبىز اتا-انالاردى بالالارىن قاۋىپتى اۋرۋلاردان ساقتاۋ ءۇشىن وسى مۇمكىندىكتى پايدالانۋعا شاقىرامىز»، - دەپ اتاپ ءوتتى ەلوردالىق قوعامدىق دەنساۋلىق ساقتاۋ باسقارماسىنىڭ باسشىسى ءاليا رۇستەموۆا.