پارادتا استانا تورىندە قۇتقارۋشى ساربازدار ساپ تۇزەپ بارادى

استانا. KAZINFORM - ەلورداداعى اسكەري پارادتا توتەنشە جاعدايلار مينيسترلىگىنىڭ حالىقتى ءورت پەن تاسقىننان، ءزىلزالا مەن تەحنوگەندىك اپاتتان قۇتقارۋعا ماماندانعان وفيتسەرلەرى مەن سەرجانتتارى بوي كورسەتتى.

ارىس پەن بايزاق اۋدانىنداعى الاپات جارىلىستار؛ قوستاناي، اباي وبلىسىنداعى ورمان ورتتەرى؛ جومارت، لەنين شاحتالارىنداعى قايعىلى اپاتتار؛ كەيىنگى 80 جىلدا بولماعان، 100 مىڭنان استام ادامنىڭ ومىرىنە اسەر ەتكەن 2024 -جىلعى تاسقىن؛ بۇلاردىڭ ءبارى توتەنشە جاعدايلار قىزمەتىن شۇعىل رەفورمالاۋ كەرەكتىگىن كورسەتكەن. پاراد الاڭىندا وسى رەفورمالاردى جۇيكەسىمەن سەزىنىپ، ءون بويىنان وتكىزىپ جۇرگەن ساربازدار كەتىپ بارادى.

استاناداعى تۇرعىن ۇيدە بولعان ورتتەن ادامداردى قۇتقارۋ جولىندا ەرلىكپەن قازا تاپقان قۇتقارۋشى اسقار زابيكۋلين تاۋەلسىز ت ج م جۇيەسىندەگى قىزمەتكەرلەردىڭ ماڭگى ۇلگى تۇتار تۇلعاسى بولىپ تاريحتا قالعانى جۇرتتىڭ جادىندا.

ايتا كەتۋ كەرەك، بۇگىنگى اسكەري شەرۋگە 4 مىڭنان استام اسكەري قىزمەتشى، 200 دەن استام اسكەري تەحنيكا، 66 ۇشۋ اپپاراتى تارتىلعان.

سونداي-اق، پارادتا بيىل ساتىپ العان سۋ جاڭا Airbus ا-400 اسكەري-كولىك ۇشاعى العاش رەت قاتىسىپ وتىر. ارميالىق مي-17، مي-171 ش، مي-35 جانە كولىكتىك س-295، تۋ-154 م، ل-410 ۇشاقتارى، سۋ-30 س م، سۋ-25 جويعىش ۇشاقتارى، ل-39 وقۋ- جاۋىنگەرلىك ۇشاعىنىڭ ەكيپاجدارى شەرۋدىڭ ايبىنىنا اۋەدەن ايبىن قوسۋدا.