«استانا - ەسىرتكىسىز قالا»: ەلوردادا جاپپاي ۆەلوشەرۋ وتەدى

استانا. KAZINFORM - ەلوردادا 25 - مامىر كۇنى «استانا - ەسىرتكىسىز قالا» ۇرانىمەن جاپپاي ۆەلوشەرۋ وتەدى. بۇل ءىس- شارا سالاماتتى ءومىر سالتىن ناسيحاتتاپ، قوعامدى ماڭىزدى الەۋمەتتىك باستامالارعا بىرىكتىرۋدى ماقسات ەتەدى، دەپ حابارلايدى قالا اكىمدىگىنىڭ رەسمي سايتى.

ۆەلوشەرۋ باعىتى 25 شاقىرىمدى قۇرايدى. قاتىسۋشىلار قوسشى باعىتى بويىنداعى اينالما ۆەلوجولدان باستاپ، يلينكا (ۇركەر) تۇرعىن الابىنداعى «جاسىل بەلدەۋ» ساياباعىندا مارەگە جەتەدى.

تىركەۋ ۆەلوشەرۋ كۇنى، ياعني 25 - مامىردا ساعات 07:30 دان 09:00 گە دەيىن جۇرگىزىلەدى. باستالۋى - 09:00. قاتىسۋ تەگىن. ءاربىر قاتىسۋشى ءوز ۆەلوسيپەدىمەن كەلۋى ءتيىس.

استانا قالاسىنىڭ دەنە شىنىقتىرۋ جانە سپورت باسقارماسىنىڭ باسپا ءسوز حاتشىسى ءمادينا ايتقاليەۆانىڭ ايتۋىنشا، بۇل - سپورتتىق جارىس ەمەس، سوندىقتان ەلوردانىڭ كەز كەلگەن تۇرعىنى مەن قوناعى، جاسىنا قاراماستان، شاراعا قاتىسا الادى.

- بۇل - بارشاعا ارنالعان مەرەكەلىك ۆەلوشەرۋ. جاس ەرەكشەلىگىنە ەشقانداي شەكتەۋ جوق. باستى تالاپتاردىڭ ءبىرى - قاتىسۋشىلار تەك تىركەۋ كەزىندە مەديتسينالىق انىقتاما ۇسىنۋى قاجەت. ەلوردا تۇرعىندارى مەن قوناقتارىن بەلسەندى قاتىسۋعا شاقىرامىز. ۆەلوشەرۋ - سالاماتتى ءومىر سالتىن ناسيحاتتايتىن، كوتەرىڭكى كوڭىل كۇي سىيلايتىن ەرەكشە وقيعا بولماق، - دەيدى ول.

ۇيىمداستىرۋشىلار ۆەلوشەرۋ سوڭىندا تىركەلگەن قاتىسۋشىلار اراسىندا لوتەرەيا ۇيىمداستىرىپ، باعالى سىيلىقتار ويناتىلاتىنىن حابارلادى.