استانا سوتى قاشاعان وپەراتورىنا بەرىلگەن ەكولوگيا مينيسترلىگىنىڭ نۇسقاماسىن جويدى

استانا. KAZINFORM - ەلوردانىڭ اكىمشىلىك ىستەر جونىندەگى سوت القاسى «نورت كاسپيان وپەرەيتينگ كومپاني ن. ۆ. » كومپانياسىنىڭ اتىراۋ وبلىسى ەكولوگيا دەپارتامەنتىنە قارسى نۇسقامانى زاڭسىز دەپ تانۋ جانە ونى جويۋ تۋرالى اكىمشىلىك ءىسىن قارادى.

ءىستى قاراۋ بارىسىندا ۋاكىلەتتى ورگان نۇسقاما شىعارعان كەزدە ق ر اكىمشىلىك راسىمدىك-پروتسەستىك كودەكسىندە كوزدەلگەن راسىمدىك زاڭ بۇزۋشىلىقتارعا جول بەرگەنى انىقتالدى. بۇل اتالعان نۇسقامانى جويۋعا نەگىز بولدى.

الايدا، بۇل راسىمدىك زاڭ بۇزۋشىلىقتار جويىلۋى مۇمكىن بولعاندىقتان، سوت اتىراۋ وبلىسى ەكولوگيا دەپارتامەنتىنە اكىمشىلىك ءراسىمدى ۋاكىلەتتى ورگاننىڭ قۇقىقتىق ۇستانىمىن ەسكەرە وتىرىپ اياقتاۋ مىندەتىن جۇكتەدى، ءبىراق ەكولوگيالىق زاڭ بۇزۋشىلىقتاردىڭ ءمانى تالقىلانعان جوق.

سونىمەن قاتار، نۇسقامانىڭ راسىمدىك تالاپتى ساقتاماۋىنا بايلانىستى جويىلۋى ەكولوگيالىق زاڭناما نورمالارىنىڭ بۇزىلماعانىن اۆتوماتتى تۇردە بىلدىرمەيدى.

سوت بۇل ءىستى قاراۋ بارىسىندا ەكولوگيا دەپارتامەنتىنىڭ انىقتاعان زاڭ بۇزۋشىلىقتار بويىنشا تۇجىرىمنىڭ نەگىزدىلىگىنە نەمەسە نەگىزسىزدىگىنە باعا بەرگەن جوق.

وسىلايشا، سوت شەشىمى ەكولوگيا دەپارتامەنتى انىقتاعان زاڭ بۇزۋشىلىقتاردىڭ مانىنە اسەر ەتپەيدى جانە ۋاكىلەتتى ورگان راسىمدىك كەمشىلىكتى جويعان جاعدايدا قايتا ارەكەت ەتۋ مۇمكىندىگىن جوققا شىعارمايدى.

ءبىز وسى ورايدا ەكولوگيا جانە تابيعي رەسۋرستار مينيسترلىگىنەن تۇسىنىكتەمە سۇرادىق. ۆەدومستۆو اتالعان جاعدايعا قاتىستى سوت شەشىمىنىڭ رەسمي كوشىرمەسىن العاننان كەيىن تۇسىنىكتەمە بەرىلەتىنىن حابارلادى.

ەسكە سالايىق، بىلتىر قازاقستان قاشاعان وپەراتورىنان تالاپ ەتىپ وتىرعان سومانى 160 ميلليارد دوللارعا ۇلعايتتى.

ايتا كەتسەك، قاشاعان گازىن وڭدەيتىن زاۋىت 2026 -جىلى ىسكە قوسىلادى.