استانا مەن الماتىنىڭ قاي اۋداندارىندا باسپانا ساتىپ الۋعا سۇرانىس جوعارى

الماتى. KAZINFORM - ەلدەگى تانىمال جىلجىمايتىن مۇلىك پلاتفورماسىنىڭ ساتۋ ءبولىمىنىڭ باسشىسى يمران وسمانوۆ الماتى مەن استانادا ءۇي ساتىپ الۋعا سۇرانىس جوعارى اۋدانداردى اتادى.

ريەلتورلاردىڭ XVI سەزىندە krisha.kz ساتۋ ءبولىمىنىڭ باسشىسى يمران وسمانوۆ ساتىپ الۋشىلاردىڭ قالاۋى جىل وتكەن سايىن وزگەرەتىنىن اتاپ ءوتتى.

سپيكەردىڭ سوزىنشە، ۋاقىت ءبىر ورنىندا تۇرمايدى، زاماناۋي ساتىپ الۋشى دامىپ كەلەدى. كەشە وزەكتى بولعان نارسە بۇگىندە نارىق تالاپتارىنا جاۋاپ بەرمەۋى مۇمكىن. قازىر ساتىپ الۋشىلاردىڭ 41 شارشى مەتردەن 68 شارشى مەترگە دەيىن ءبىر جانە ەكى بولمەلى پاتەرگە قىزىعۋشىلىعى ارتتى. تالداۋ 2024 -جىلدىڭ 1-قازانىنان 2025 -جىلدىڭ 31-ناۋرىزىنا دەيىنگى كەزەڭدەگى دەرەكتەرگە نەگىزدەلگەن.

- ورتاشا العاندا، جىلجىمايتىن مۇلىك پلاتفورمامىزدا 78,5 كۇن تۇرادى. بۇل وتە جاقسى كورسەتكىش - پاتەردى ساتۋعا ورتا ەسەپپەن ەكى جارىم ايدان ءسال استام ۋاقىت قاجەت، - دەدى وسمانوۆ.

باسپانا ساتىپ الۋشىلار اراسىندا ەڭ كوپ سۇرانىسقا يە اۋدان 

ساراپشىنىڭ ايتۋىنشا، الماتىدا ءۇي ساتىپ الۋشىلار اراسىندا ەڭ كوپ سۇرانىسقا يە - بوستاندىق اۋدانى. اۋەزوۆ اۋدانىنا دا قىزىعۋشىلىق بار. اسىرەسە، اباي مەن التىنسارين داڭعىلى قيىلىساتىن اۋماقتا.

باعاسىنا كەلەتىن بولساق، كوبىنەسە ساتىپ الۋشىلار پاتەردى 25- 46,7 ميلليون تەڭگە ارالىعىنداعى سوماعا قاراستىرادى. سونداي-اق قۇنى 25-35 ميلليون تەڭگە ارالىعىنداعى جاڭا قۇرىلىسقا دا تۇراقتى سۇرانىس بار.

- الايدا تۇرعىن ءۇي باعاسى كوتەرىلگەن سايىن وسى باعا ساناتتارىنداعى قولجەتىمدى جىلجىمايتىن مۇلىك سانى بىرتە- بىرتە ازايىپ كەلەدى، - دەپ قوستى ول.

سونداي-اق يمران وسمانوۆ الماتىدا ناۋرىزباي اۋدانىنا قىزىعۋشىلىقتىڭ ارتىپ كەلە جاتقانىن تىلگە تيەك ەتتى. بۇل ەڭ الدىمەن تۇرعىن ءۇي نارىعىنداعى قولجەتىمدى ۇسىنىستارعا بايلانىستى. اسىرەسە «شۇعىلا» شاعىن اۋدانى سۇرانىسقا يە، مۇندا جوندەۋ جۇمىستارى جۇرگىزىلگەن پاتەرلەردى 20-40 ميلليون تەڭگە ارالىعىندا ساتىپ الۋعا بولادى. قوسىمشا ارتىقشىلىعى كولىك ينفراقۇرىلىمىنىڭ دامىۋى - اۋداندا جاڭا مەترو جەلىسى سالىنىپ جاتىر.

سونىمەن قاتار ساتبايەۆ پەن تۇرعىت وزال، اباي جانە تۇرعىت وزال كوشەلەرىنىڭ قيىلىسىنداعى اۋدانداردا، روزىباقيەۆ كوشەسىندەگى MEGA ساۋدا ورتالىعىنىڭ جانىندا ورنالاسقان پاتەرلەرگە تۇراقتى سۇرانىس بار - بۇل ايماق ىڭعايلى ورنالاسۋىمەن جانە دامىعان ينفراقۇرىلىمىمەن تارتىمدى.

ەل استاناسىنا كەلەتىن بولساق، ساراپشىنىڭ ايتۋىنشا، جاڭا تەمىرجول ۆوكزالىنىڭ اينالاسى قارقىندى دامىپ كەلەدى. مۇندا ساتىپ الۋشىلاردىڭ ساناتتارىنا باعىتتالعان جاڭا قۇرىلىس كوپ. ودان بولەك «حان شاتىر» ساۋدا ورتالىعىنىڭ ارتىندا ورنالاسقان جاعالاۋ اۋدانىنا دا قىزىعۋشىلىق جوعارى، مۇندا كومفورت- پليۋس جانە بيزنەس- كلاسس سەگمەنتتەرىندە 25 ميلليون تەڭگەدەن باستالادى. بوتانيكالىق باق ايماعىدا سۇرانىسقا يە.

قازاقستان ريەلتورلارىنىڭ بىرىككەن قاۋىمداستىعى پرەزيدەنتىنىڭ كەڭەسشىسى نينا لۋكيانەنكو جىلجىمايتىن مۇلىكتىڭ نارىقتىق باعاسى جارنامالار سانىنا نەمەسە ساتۋشىلار مالىمدەگەن سوماعا بايلانىستى قالىپتاسپايتىنىن باسا ايتتى.

- تۇرعىن ءۇي باعاسى كوپ جاعدايدا مەملەكەتتىك قولداۋعا بايلانىستى. وعان ءبىرىڭعاي ۇلتتىق زەينەتاقى قورىنان جيناقتالعان زەينەتاقى قاراجاتىن جىلجىمايتىن مۇلىك ساتىپ الۋعا پايدالانۋعا رۇقسات بەرىلگەن كەزدەگى باعانىڭ شارىقتاپ كەتۋى جارقىن مىسال. بۇل قادام نارىقتى ايتارلىقتاي وزگەرتتى، - دەپ ەسكە الدى ول.

ساراپشىنىڭ ايتۋىنشا، قازىر تۇرعىن ءۇي نارىعى تۇراقتى.

- قازىر باعانىڭ ءوسۋىن كورىپ وتىرعان جوقپىز. جاسالعان مامىلەلەر سانى وتكەن جىلدىڭ دەڭگەيىندە قالدى. قايتالاما نارىقتاعى باعا تومەندەدى. جالعا بەرىلەنتىن باسپانا باعاسى دا وسكەن جوق، - اتاپ ءوتتى لۋكيانەنكو.

ۇلتتىق ستاتيستيكا بيۋروسى جاريالاعان مالىمەتتەرگە سايكەس، 2025 -جىلدىڭ ناۋرىز ايىندا قازاقستانداعى جىلجىمايتىن مۇلىك نارىعىندا ءارتۇرلى ءۇردىس بايقالدى. وسىلايشا، ءبىر ايدا جاڭا تۇرعىن ءۇي قۇنى %0,6- عا وسسە، قولدانىستاعى تۇرعىن ءۇي باعاسى %1,4- عا ارتتى. بۇل رەتتە جيھازى بار پاتەرلەردى جالعا الۋ، كەرىسىنشە، ورتاشا ەسەپپەن %1- عا تومەندەگەنىن كورسەتتى.

جاڭا سالىق كودەكسىنىڭ جوباسىنا سايكەس، ەلدەگى بانكتەرگە كورپوراتيۆتىك تابىس سالىعىن 25 پايىزعا دەيىن كوتەرۋ ۇسىنىلىپ وتىر. بۇل يپوتەكا قۇنىنا قالاي اسەر ەتەتىنى تۋرۆلى ساراپشىلار ايتقان بولاتىن.