استانا LRT: قىتايدىڭ جەڭىل رەلستى پويىزدارىنا تاپسىرىس بەرىلىپ جاتىر

استانا. KAZINFORM - قىتايدان استانا LRT جەلىسىمەن قاتىنايتىن جەڭىل رەلستى پويىزداردى ساتىپ الۋ بويىنشا جۇمىستار جۇرگىزىلىپ جاتىر. بۇل تۋرالى ەلوردا اكىمدىگىنىڭ Kazinform تىلشىسىنە بەرگەن رەسمي جاۋابىندا ايتىلعان.

اكىمدىكتىڭ باسپا ءسوز قىزمەتى بۇگىنگى كۇندە استانا LRT  ءنىڭ قۇرىلىسى قاي كەزەڭگە كەلگەنى جايلى مالىمەت بەرگەن:

«ەستاكادالىق بولىكتىڭ قۇرىلىسى، ستانتسيالاردا تەمىربەتون جۇمىستارى اياقتالدى، سونداي- اق ەسىل وزەنى ارقىلى كوپىر سالىندى. ورىندالعان بەتون قۇيۋ جۇمىستارىنىڭ جالپى كولەمى - شامامەن 450 مىڭ شارشى مەتر. سونىمەن قاتار، بۇرعىلاۋ- تىعىزداۋ قادالارىن، تىرەكتەردى ورناتۋ، قۇراما ارقالىقتاردى مونتاجداۋ جانە ءمونوليتتى ارقالىقتاردى قۇيۋ بويىنشا جۇمىستار تولىق كولەمدە ورىندالدى».

سونداي- اق، جەرگىلىكتى اتقارۋشى ورگان استانا LRT جەلىسىمەن قاتىنايتىن جىلجىمالى قۇرامعا تاپسىرىس بەرۋ جۇمىستارى جۇرگىزىلىپ جاتقانىن مالىمدەدى.

«شارت تالاپتارىنا سايكەس 19 جىلجىمالى قۇرام ساتىپ الىنادى. جىلجىمالى قۇرامداردى ءوندىرۋشى ەل - ق ح ر. بۇگىنگى تاڭدا جىلجىمالى قۇرامعا تاپسىرىس بەرۋ جۇمىستارى جۇرگىزىلىپ جاتىر»، - دەلىنگەن جاۋاپتا.

ايتا كەتەيىك، بۇعان دەيىن استانادا LRT دەپوسىنىڭ قۇرىلىسى باستالعانى تۋرالى جازعان ەدىك. دەپو حالىقارالىق اۋەجاي ماڭايىندا ورنالاسادى جانە LRT جۇيەسىنە تەحنيكالىق قىزمەت كورسەتۋ مەن باسقارۋ ورتالىعىنا اينالادى.

ودان بولەك، LRT پويىزى وپەراتورلارىن وقىتۋعا الدىن الا قابىلداۋ باستالعانى حابارلاندى.

اۆتور
ەربول جانات