استانا كۇنى قالاي اتالىپ وتەدى

استانا. KAZINFORM - قازاقستاندا 6 - شىلدەدە استانا كۇنى اتاپ وتىلەدى. بۇل مەرەكەگە وراي ەلوردادا ءداستۇرلى تۇردە جۇزدەن استام ءتۇرلى باعىتتاعى ءىس- شارا ۇيىمداستىرىلادى. بۇل تۋرالى ەلوردا اكىمدىگىنىڭ رەسمي سايتى جازدى.

بيىل ەلوردا تۇرعىندارى مەن قوناقتارى ءۇشىن ەرەكشە وقيعالار، كونسەرتتەر، شوۋلار، قويىلىمدار، اكسيالار، كورمەلەر، سپورتتىق تۋرنيرلەر جانە باسقا دا كوپتەگەن ءىس-شارا ازىرلەنىپ وتىر. بۇل جونىندە قالالىق كوممۋنيكاتسيالار قىزمەتىندە وتكەن بريفينگتە استانا قالاسىنىڭ مادەنيەت باسقارماسىنىڭ باسشىسى جاناباي مەيىرمانقۇلوۆ پەن قالالىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى ازامات اعزاموۆ ايتىپ بەردى.

جاز بويى دەمالىس جانە مەرەكە كۇندەرى ەلوردالىق ساياباقتاردا «وتباسى Time» بالالار شىعارماشىلىعى فەستيۆالى ءوتىپ جاتىر.

30 -ماۋسىمدا ەلوردادا IV حالىقارالىق «قۇرالاي» قۋىرشاق تەاترلارى فەستيۆالى سالتاناتتى شەرۋىمەن باستالدى. فەستيۆالدىڭ ماقساتى - حالىقارالىق مادەني بايلانىستاردى نىعايتۋ، كاسىبي شەبەرلىكتى دامىتۋ جانە قۋىرشاق تەاترى ونەرىن ناسيحاتتاۋ. شاراعا انگليا، اۋستريا، قىتاي، تۇركيا، گرۋزيا، يسپانيا، تايلاند، وزبەكستان ەلدەرى مەن قازاقستاننىڭ وڭىرلەرىنەن تەاتر ۇجىمدارى قاتىسۋدا. فەستيۆال 4-شىلدەگە دەيىن جالعاسادى.

30- ماۋسىم مەن 6 -شىلدە ارالىعىندا ج. ۇشكەمپىروۆ اتىنداعى جەكپە-جەك سارايىندا دۇنيەجۇزىلىك بوكس قاۋىمداستىعى World Boxing اياسىندا ەرلەر مەن ايەلدەر اراسىندا بوكستان الەم كۋبوگى ءوتىپ جاتىر. تۋرنيرگە 31 ەلدەن 300 دەن استام سپورتشى قاتىسىپ جاتىر، ونىڭ ىشىندە بارلىق 20 سالماق دارەجەسىندە قازاقستاندىق قۇراما بار.

فينالدىق جەكپە-جەكتەر 6 -شىلدە كۇنى ساعات 14:00 دە جانە 19:00 دە وتەدى. كىرۋ تەگىن.

2-شىلدەدە پاراليمپيادا ورتالىعىندا زەينەتكەرلەر مەن مۇمكىندىگى شەكتەۋلى ادامدار اراسىندا توعىزقۇمالاق پەن شاحماتتان تۋرنيرلەر وتەدى.

3 -شىلدەدە ەسىل وزەنىنىڭ جاعاسىنداعى امفيتەاتر ساحناسىندا «JazzVIBe» كونتسەرتى ۇيىمداستىرىلادى. باعدارلامادا «استانا» ەسترادالىق-سيمفونيالىق وركەسترى، «جاستار» سارايىنىڭ «جىگەر» ەسترادالىق- دجاز ءانسامبلى جانە قازاقستاندىق ەسترادا جۇلدىزدارى ونەر كورسەتەدى.

3 -شىلدە پاراليمپيادا ورتالىعىندا مۇمكىندىگى شەكتەۋلى سپورتشىلار اراسىندا العاشقى قالالىق سپارتاكيادا وتەدى. سول كۇنى ب. ساتتارحانوۆ اتىنداعى سپورت كەشەنىندە «سارايشىق» اۋدانى ۇيىمدارى اراسىندا ۆولەيبولدان تۋرنير وتەدى.

3-5-شىلدە ارالىعىندا Beeline Arena دا قازاق كۇرەسىنەن قازاقستان چەمپيوناتى وتەدى.

4-شىلدەدە ءال-فارابي اتىنداعى وقۋشىلار سارايىندا «ايالاعان استانا» اتتى مەرەكەلىك كونسەرت وتەدى. سول كۇنى م. وتەمىسوۆ اتىنداعى وقۋشىلار سارايىندا street-art فورماتىنداعى «استاناعا ارناۋ» كوشە فەستيۆالى وتەدى.

4 -شىلدەدە «جاستار» سارايىندا جۇمىسشى ماماندىقتار جىلى اياسىندا وتكەن «مەنىڭ ماماندىعىم -ماقتانىشىم» اتتى قالالىق شىعارماشىلىق بايقاۋدىڭ جەڭىمپازدارىن ماراپاتتاۋ ءراسىمى وتەدى. وسى كۇنى بەيبىتشىلىك جانە كەلىسىم سارايىندا ەلىمىزدىڭ ۇزدىك انشىلەرى، كۇيشى- جىرشىلاردىڭ قاتىسۋىمەن «اسىل مۇرا» اتتى مەرەكەلىك كونسەرت وتەدى. ءىس-شارا بارىسىندا حالىق كومپوزيتورلارىنىڭ شىعارمالارى ورىندالادى. كونسەرتكە ەلىمىزدىڭ تانىمال ونەر شەبەرلەرى مەن شىعارماشىلىق ۇجىمدارى قاتىسادى. «عاشىقتار» ساياباعىندا «استانا ساقاسى» تۋرنيرىندە اسىق اتۋدان ەڭ مىقتىلارى انىقتالادى.

«نۇرجول» بۋلۆارىندا «اسقاقتاعان استانا!» مەرەكەلىك ءىس- شاراسى - دومبىرا party ۇيىمداستىرىلادى، ال «جەتىسۋ» ساياباعىندا «QALA FEST» فەستيۆالى مەن كىتاپ جارمەڭكەسى وتەدى.

4 -شىلدە - زەينەتكەرلەر اراسىندا شاحمات ءتۋرنيرى مەن «عاشىقتار» اللەياسىندا اسىق اتۋ جارىسى. سونداي-اق، بايقوڭىر اۋدانىنىڭ كوممۋنالدىق قىزمەتكەرلەرى اراسىندا ميني- فۋتبول ءتۋرنيرى وتەدى.

4 -شىلدەدە اباي داڭعىلى بويىندا ورنالاسقان «كوممۋنالدىق قىزمەتكەرلەر» سكۆەرىنىڭ اشىلۋ سالتاناتى وتەدى.

5 -شىلدەدە ترياتلون پاركىندە گرەك- ريم، ەركىن كۇرەس، دزيۋدو، قازاق كۇرەسى جانە اۆتوشەرۋ قامتىلعان كۇرەس فەستيۆالى وتەدى.

5 - شىلدەدە ەسىل وزەنىنىڭ جاعاسىنداعى امفيتەاتر ساحناسىندا «استانا - ارمان قالا» اتتى مەرەكەلىك كونسەرت وتەدى. باعدارلامادا تانىمال مادەنيەت قايراتكەرلەرى، حالىقارالىق جانە رەسپۋبليكالىق بايقاۋلاردىڭ لاۋرەاتتارى، قازاقستاندىق ەسترادا جۇلدىزدارى ونەر كورسەتەدى.

5 -شىلدەدە VI «اسكەري كەرنەي» اسكەري-مۋزىكالىق فەستيۆالى وتەدى.

فەستيۆال اياسىندا 5 -شىلدەدە ۇرمەلى وركەسترلەردىڭ قويىلىمدارى «عاشىقتار»، «جەتىسۋ»، «جەرۇيىق» ساياباقتارىندا وتەدى.

فەستيۆال 6 -شىلدە كۇنى «قازاق ەلى» مونۋمەنتىندەگى گالا-كونسەرتپەن اياقتالادى.

5-6-شىلدە كۇندەرى ورتالىق ساياباقتا «مەرەكەلىك ساياباق» اتتى وتباسىلىق دەمالىس فەستيۆالى وتەدى. فەستيۆال اياسىندا كورەرمەندەرگە اشىق اسپان استىنداعى فيلم كورسەتىلىمدەرى، تەاترلاندىرىلعان قويىلىمدار، بەينەلەۋ ونەرى مەن قولونەر بويىنشا شەبەرلىك ساباقتارى، سپورتتىق جانە ويىن- ساۋىق باعدارلامالار، كورمەلەر مەن كونسەرتتەر ۇسىنىلادى.

سونداي- اق 5-6-شىلدە كۇندەرى استانادا «قالالىق پەرفورمانستار فەستيۆالى» وتەدى. ەلوردالىقتار مەن قوناقتارعا اشىق اسپان استىندا ساياباقتار مەن الاڭداردا تەاترلاندىرىلعان قويىلىمدار ۇسىنىلادى. فەستيۆال قالا كوشەلەرىندەگى ارتىستەر شەرۋىمەن اشىلادى. ەكى كۇندىك باعدارلاماعا استانا، الماتى، ماسكەۋ قالالارىنان شىعارماشىلىق ۇجىمدار قاتىسادى.

5-6-شىلدە كۇندەرى وتەتىن جۇمىسشى ماماندىقتار جىلى اياسىندا مەملەكەتتىك دراما جانە كومەديا تەاترى العاش رەت «ارماندار ورىندالادى» سپەكتاكلىن ۇسىنادى. قويىلىم ەرەكشەلىگى - كاسىبي ارتىستەرمەن قاتار ءتۇرلى جۇمىسشى ماماندىق يەلەرى دە ساحناعا شىعادى. مۇعالىمدەر، جۋرناليستەر، دارىگەرلەر، اسپازدار، مەيىربيكەلەر، جۇرگىزۋشىلەر، قۇرىلىسشىلار جانە باسقا دا ماماندار ساحنا شىعادى. ەموتسيونالدى جانە شىنايى ساحنالىق بەينەلەر ارقىلى كورەرمەندەرمەن ءوز ومىرلىك تاريحتارىن، ارماندارىن جانە كاسىبي جولدارىمەن بولىسەدى. سونداي-اق «جاستار»، «ناز»، «قاناتتىلار» تەاترلارىندا جانە مۋزىكالىق جاس كورەرمەن جانە ماكسيم گوركي اتىنداعى اكادەميالىق ورىس تەاترىندا جوسپارلانعان سپەكتاكلدەر قويىلادى.

6 -شىلدەدە ۇلتتىق دومبىرا كۇنىنە وراي مەرەكەلىك ءىس- شارالار «اتىراۋ» كوپىرىندە جانە ورتالىق ساياباقتا وتەدى. مەرەكەلىك كونسەرتتىك باعدارلاما امفيتەاتر ساحناسىندا جالعاسادى. سونىمەن قاتار قالانىڭ تۇرعىن الاپتارىندا كۇندىزگى مەرەكەلىك كونسەرتتەر وتەدى. وعان مادەنيەت باسقارماسىنا قاراستى مەكەمەلەردىڭ شىعارماشىلىق ۇجىمدارى مەن قازاقستاندىق ەسترادا جۇلدىزدارى قاتىسادى. وسى كۇنى دومبىرا كۇنىنە وراي «قازاق ەلى» مونۋمەنتى الاڭىندا «Jastar Energy» جاستار كونسەرتى وتەدى. باعدارلامادا جاس ورىنداۋشىلاردىڭ ونەر كورسەتۋى جانە كورەرمەنمەن ينتەراكتيۆتى مادەني قارىم- قاتىناسى وتەدى. ماقساتى - جاستار شىعارماشىلىعىن قولداۋ، مادەني بەلسەندىلىكتى ارتتىرۋ جانە زاماناۋي ونەردى ناسيحاتتاۋ.

6 -شىلدەدە «استانا- ارەنا» ستاديونى اۋماعىندا وتاندىق ەسترادا جۇلدىزدارىنىڭ قاتىسۋىمەن OPEN AIR كونتسەرتى وتەدى.

6 -شىلدەدە «اقجايىق» سكۆەرىندە زاماناۋي بي تۇرلەرىنەن جاستار اراسىندا «ەلوردالىق باتل» بي سايىسى وتەدى.

6 -شىلدەدە «قازانات» يپپودرومىندا بايگە تۇرلەرىنەن «ەلوردا كۋبوگى» ءتۋرنيرى جانە قازاقتىڭ ۇلتتىق سپورت تۇرلەرىنىڭ ۇزدىكتەرى مەن مىقتىلارى قاتىساتىن «تولاعاي» سايىسى وتەدى. سونداي-اق مەرەكە كۇندەرى قالا بويىنشا جاڭا اباتتاندىرىلعان قوعامدىق كەڭىستىكتەر مەن اۋلالار اشىلادى.

7 -شىلدەدە امفيتەاتر ساحناسىندا «جاستار» سارايىنىڭ ەسترادالىق- سيمفونيالىق وركەسترىنىڭ سۇيەمەلدەۋىمەن «التىن دومبىرا» مەكتەبىنىڭ 400 وقۋشىسىنىڭ قاتىسۋىمەن ۇلتتىق دومبىرا كۇنىنە ارنالعان مەرەكەلىك- كونسەرتتىك باعدارلاما وتەدى.

8 -شىلدەدە امفيتەاتر ساحناسىندا «مەرەيلى وتباسى» ۇلتتىق بايقاۋىنىڭ جەڭىمپازدارىن ماراپاتتاۋ سالتاناتى وتەدى.

بايقاۋدىڭ ماقساتى - ءداستۇردى ساقتاۋ، بالا تاربيەسى مەن قوعامنىڭ دامۋىنا ۇلەس قوساتىن ونەگەلى وتباسىلاردى انىقتاۋ جانە تانۋ، وتباسىلىق قۇندىلىقتاردى ناسيحاتتاۋ، وتباسى ينستيتۋتىن نىعايتۋ.

ايتا كەتەيىك، استانادا مولدوۆا ەلشىلىگى اشىلادى.