استانا - كۇن ءوتۋ قاۋپى ەڭ جوعارى ءوڭىر

استانا. KAZINFORM - قازگيدرومەت مالىمەتىنشە، ەلىمىزدىڭ وڭتۇستىك وڭىرلەرىندە كۇن قاتتى ىسيدى. سوعان بايلانىستى دارىگەرلەر كۇننەن قورعانۋ كەرەكتىگىن ەسكەرتەدى.

بىلتىر ەلىمىزدە 18 ادامعا كۇن ءوتىپ، دارىگەردىڭ كومەگىنە جۇگىنگەن. ال جىل باسىنان بەرى 1 عانا ادام ءدال وسىلاي شاعىمدانعان. بۇل تۋرالى دەنساۋلىق ساقتاۋ مينيسترلىگى Kazinform ءتىلشىسىنىڭ رەسمي ساۋالىنا بەرگەن جاۋابىندا مالىمدەدى.

- 2024 -جىلى كۇن ءوتۋدىڭ سالدارىنان ەلىمىزدە 18 ادام دارىگەردىڭ كومەگىنە جۇگىنگەن، ال 2025 -جىلدىڭ العاشقى ءتورت ايىندا مۇنداي ءبىر عانا جاعداي تىركەلگەن. كۇن مەن جىلۋ سوققىسىنىڭ الدىن الۋ ءۇشىن ەڭ الدىمەن سۋ ءىشۋ رەجيمىن كۇشەيتۋ كەرەك.

سونداي- اق باستى تىكەلەي كۇن ساۋلەسىنەن قورعاپ، كۇننىڭ بەلسەندى كەزەڭى سانالاتىن ساعات 11:00-دەن 16:00-گە دەيىن اشىق كۇن استىندا جۇرمەۋ قاجەت. بۇل ۋاقىتتا اعزاعا قوسىمشا فيزيكالىق جۇكتەمە تۇسىرمەگەن ءجون.

سونىمەن قاتار كۇننەن قورعايتىن ارنايى كرەمدەر قولدانىپ، كيىمنىڭ جەڭىل، اشىق ءتۇستى ءارى تابيعي ماتادان بولعانى ابزال. سالقىن سۋمەن جۋىنۋ نەمەسە شومىلۋ دەنەنىڭ قىزىپ كەتۋىنەن ساقتاپ، دەگيدراتاتسيانىڭ الدىن الۋعا كومەكتەسەدى. اۋا رايى ىستىق كۇندەرى وسى قاراپايىم ەرەجەلەردى ساقتاۋ ارقىلى ءوز دەنساۋلىعىڭىزدى قورعاي الاسىز، - دەيدى مينيسترلىك ماماندارى.

جاۋاپتىلاردىڭ ايتۋىنشا، ەلىمىزدە كۇن ءوتۋ قاۋپى ەڭ جوعارى ءوڭىر - ەلوردا ەكەن.

- كۇن ءوتۋ دەرەكتەرى ەڭ كوپ تىركەلگەن وڭىرلەردىڭ قاتارىندا استانا قالاسى كوش باستاپ تۇر - مۇندا 5 ادامعا كۇن وتكەن. ودان كەيىن قوستاناي وبلىسىندا – 3، ال تۇركىستان وبلىسىندا - 2 جاعداي تىركەلگەن. ەل وڭىرلەرىنىڭ ىشىندە، اسىرەسە استانا قالاسىندا كۇن ءوتۋ قاۋپى جوعارى دەڭگەيدە ساقتالىپ وتىر، - دەيدى ولار.

ايتا كەتەيىك، دەنساۋلىق ساقتاۋ پروتسەستەرىن سيفرلاندىراتىن اقپاراتتىق جۇيە قۇرىلادى.

اۆتور

ارۋجان ماحمۋت